El Conseyu de Gobiernu de la Universidá d'Uviéu aprobó, na so xunta ordinaria celebrada esta mañana, el nomamientu del profesor Svante Pääbo como Doctor Honoris Causa de la institución. El profesor Pääbo ye na actualidá director del departamentu de Xenética del Institutu Max  Planck d'Antropoloxía Evolutiva, recibió'l Premiu Princesa d'Asturies d'Investigación Científica y Técnica en 2018 y el Nobel de Medicina en 2022. Dende l'añu 2007, caltien una estrecha vinculación coles árees de  arqueoloxía y prehistoria del Departamentu d'Hestoria de la Universidá d'Uviéu. 

La propuesta de nomamientu, que surde del rectoráu, cuntó col sofitu del Departamentu d'Hestoria de la Universidá d'Uviéu y de la Fundación Princesa. Nella, recuérdase que la collaboración de Pääbo “primeru col profesor Fortea, desgraciadamente fináu en 2009, y na actualidá con Marcu de la Rasilla, foi indispensable para'l desenvolvimientu de la investigación na Cueva d'El Sidrón, y la profundización de los sos afayos, decisivos na meyora del estudiu sobro la especie neandertal y la técnica novedosa de la palogenética”. “Les numberoses publicaciones sobro estos afayos en collaboración con destacaos profesores de la nuesa universidá dexaron a la Universidá d'Uviéu ocupar un espaciu propio y destacao nesi ámbitu, recibiendo'l más alta reconocencia de la comunidá científica por ello”. 

Centru d'Inxeniería Biomédica

Per otru llau, el Conseyu de Gobiernu aprobó, pa la so remisión al Conseyu Social, la creación del Centru d'Inxeniería Biomédica (Centru BME); un centru universitariu que va sirvir pa promover la investigación y desenvolvimientu de productos y servicios por aciu l'aplicación de métodos, ferramientes y tecnoloxíes del ámbitu de la inxeniería a les disciplines de la medicina, la salú y la vida, y va fomentar les sinergias con empreses ya instituciones del sector biomédico n'Asturies. El centru, que nel so orixe yá va integrar a una docena d'investigadores ya investigadores de la Universidá d'Uviéu, va representar xuna gran oportunidá pal desenvolvimientu de proyectos d'investigación, innovación y tresferencia tecnolóxica. 

El centru, de marcáu calter tresversal, va afondar nun campu de creciente interés. La inxeniería biomédica defínese como l'aplicación de les tecnoloxíes, los principios y les práctiques de la inxeniería a los campos de la medicina y la bioloxía, especialmente pal resolvimientu de problemes y la meyora asistencial por aciu, por casu, el desenvolvimientu de dispositivos médicos, equipos de diagnósticu, la creación de biomateriales, etcétera.