El galardón de la Cátedra MediaLab estrema a aquellos alumnos que destaquen non solo pol so espediente académicu, sinón tamién por dedicar el tiempu y conocencies adquiríes na universidá a ameyorar la sociedá por aciu llabores de voluntariáu
L'estudiante Javier Gancedo Verdejo recibió güei el Premiu Impacto Positivu que concede la Cátedra MediaLab de la Universidá d'Uviéu. Esti galardón estrema a aquellos estudiantes que más destaquen pol so currículum académicu, universitariu y social. Javier Gancedo cursó Bioloxía na Universidá d'Uviéu, con premiu fin de grau, realizó'l máster universitariu en Biomedicina y Oncoloxía Molecular y anguaño realiza estudios de doctoráu. Compaxinó amás los sos estudios colos sos llabores de voluntariáu en Cáritas o nel Centru Don Orione.
Gancedo recibió la escultura acreditativa del premiu y los mil euros de la dotación económica, que va donar a Cáritas, nun actu celebráu nel Paraninfu del Edificiu Históricu de la Universidá d'Uviéu, que cuntó cola presencia de María Mitre, concejala de Facienda del Conceyu de Xixón; Reyes Ceñal, representante de Compromiso Asturies XXI; Marcelino Fernández, representante de Caxa Rural d'Asturies; Luis Alfonso Díaz, profesor collaborador de MediaLab; Ramón Rubio, director de MediaLab; Santiago Fernández, director xerente de la Fundación Universidá d'Uviéu (FUO) ya Ignacio Villaverde, rector de la Universidá d'Uviéu.
Tres la entrega del galardón, tuvo llugar la mesa redonda La tercer misión de la Universidá, que cuntó cola participación de dos socios d'honor de Compromiso Asturies XXI: Adolfo Rivas, director xerente de la Fundación Vinjoy, y Amador Menéndez, investigador del Centru Idonial y Premiu Nacional al Espardimientu de la Ciencia. La mesa foi moderada por Reyes Ceñal, directora de Compromiso Asturies XXI.
