Once alumnos de la Universidá d'Uviéu participaron nes escueles de branu que mientres dos selmanes desenvolviéronse en Karlsruhe (Alemaña) y en Pescara (Italia), onde pudieron trabayar en soluciones innovadores a cuestiones cruciales qu'encara Europa | Los Ten Days de INGENIUM son una iniciativa que dos vegaes al añu va axuntar a estudiantáu y docentes de les universidaes socies para participar n'actividaes académiques y culturales rellacionaes coles temes estratéxiques para l'Alianza
“Estos van ser díes de conectar, de compartir, d'aprender, siguiendo'l lema de l'Alianza INGENIUM, de la que vamos volver siendo embaxadores”. Con estes palabres dirixióse Ana Isabel Álvarez, directora de INGENIUM, una alianza liderada pola Universidá d'Uviéu, a los 100 estudiantes de máster y doctoráu que viaxaron el pasáu llunes a la ciudá italiana de Pescara para participar na segunda parte de los Ten Days, que se clausuraron esta fin de selmana.
La selmana anterior, ente'l 12 y el 16 de xunu, la Universidá de Ciencies Aplicaes de Karlsruhe acoyera la primera de les dos escueles de branu qu'inauguraron esta edición de los Ten Days: la Junior School. Mientres xuna selmana, 30 estudiantes de grau de les universidaes INGENIUM, unu d'ellos d'Uviéu, tuvieron la oportunidá d'aprender sobro llingua y cultura alemana y de participar en talleres sobro salú, diversidá ya inclusión.
De primeres d'esta selmana, coyó'l testigu la Universidá Gabrielle d’Annunzio de Chieti-Pescara, que foi la encargada d'entamar la Senior School, destinada a alumnos de máster y doctoráu y a allegar 10 representantes de la Universidá d'Uviéu.
Unu d'ellos foi Pablo Gancedo, estudiante del Máster en Biomedicina y Oncoloxía Molecular, que diz vivir “xuna esperiencia bien enriquecedora” onde desenvolvió “habilidaes de trabayu n'equipu y comunicación” gracies a “conferencies impartíes por reconocíos espertos en temes como la intelixencia artificial, la neurociencia y diversos aspeutos de la investigación científica”.
Pela so parte, Olumayowa Onabanjo, estudiante de doctoráu tamién na institución asturiana, destacó que “la segunda parte de los 10 díes de INGENIUM en Chieti-Pescara foi xuna oportunidá única pa compartir idees ente l'estudiantáu y el profesoráu” y p'amosar “oportunidaes pa futuros proyectos de collaboración”.
Na mesma llínea espresóse Marta Pilar Moriano, del Programa de Doctoráu en Bioloxía Molecular y Celular, pa quien la escuela brindó-yos la oportunidá d'ampliar” una rede de contactos internacionales” y ameyoró les sos “aptitúes n'adaptación y trabayu n'equipu”.
Mientres estos díes, más de 100 alumnos de posgrado formáronse en cursos especializaos sobro ciencia ya investigación, asistieron a clases maxistrales sobro salú, bienestar ya intelixencia artificial, y fixeron equipu con compañeros de los otros nueve países de l'Alianza.
La próxima edición de los Ten Days, que s'espera pal empiezu de 2024, va axuntar en dos nueves ciudaes a más estudiantes de grau, máster y doctoráu pa siguir fomentando la movilidá, l'intercambiu y la collaboración ente los miembros de la comunidá INGENIUM.
