La nueva edición del Ecosystem Integration TalentUO Lab va cuntar cola participación d'hasta diez proyectos, trés de los cualos van poder recibir 10.000 euros de sofitu económicu para ayudar al so tresformamientu en ‘start-ups’
La Universidá d'Uviéu llanza, col nome de Ecosystem Integration TalentUO Lab, la segunda edición del so llaboratoriu d'esperimentación diseñáu para l'alcuentru y l'interacción de los distintos TalentUO Labs colos que cunta la institución asturiana. Esta iniciativa resulta de la participación de la Universidá d'Uviéu como sociu líder del proyectu del Institutu Européu d'Innovación y Tecnoloxía HEI4S3-RM y ta financiada pol Banco Santander como frutu del alcuerdu de collaboración ente dambes instituciones.
El llaboratoriu ye un espaciu abiertu por que les persones puedan desenvolver idees o resolver problemes al traviés d'un procesu d'esperimentación y prototipado. Los participantes van cuntar col acompañamientu de distintos profesionales (espertos, mentores y mediadores) y colos medios qu'apurre la Universidá d'Uviéu. Ye, primero de too, un espaciu d'aprendizaxe y nél podránse prototipar oxetos, infraestructures, dispositivos, servicios, organizaciones, práctiques, procesos o metodoloxíes relatives a distintos campos del saber como l'arte, la ciencia, la empresa, la tecnoloxía, la cultura o la política.
El llaboratoriu ta abiertu a tou tipu de persones, independientemente de la so edá, nivel formativu y/o procedencia, y esisten dos modalidaes de participación: como promotor d'una propuesta a partir de la cual desenvolver el procesu de prototipado o como collaborador n'unu de los equipos de trabayu que va desenvolver la idea. La convocatoria d'idees pa la promoción d'idees empezó'l 19 de xunu y va rematar el día 29 del mesmu mes. Nun hai xuna llimitación temática específica, puede presentase cualquier idea rellacionada col arte, la ciencia, la tecnoloxía, la conocencia, la empresa, les iniciatives ciudadanes y/o públiques. El 3 de xunetu publicarán les idees escoyíes y del 4 al 18 de xunetu abre'l plazu d'inscripción pa collaboradores/ye que quieran contribuyir en dalguna d'elles.
Finalmente, el llaboratoriu de prototipado va tener llugar del 11 de setiembre al 19 d'ochobre los martes y xueves de 16 a 20 hores nel Campus d'El Milán, edificiu departamental de la Facultá de Filosofía y Lletres de la Universidá d'Uviéu. Rematáu'l llaboratoriu de prototipado, un xuráu espertu va determinar los trés prototipos con mayor potencial y viabilidá. Los prototipos escoyíos van participar nuna incubadora de start-ups del 26 d'ochobre al 30 de payares. Mientres esti tiempu, los prototipos van recibir tanto sofitu económicu (hasta un máximu de 10.000 euros) como mentorización coles mires de desenvolver esos trés proyectos de negociu y llanzalos al mercáu.
Nel llaboratoriu participa un ampliu grupu d'espertos empobinaos dende'l Vicerrectorado de Tresferencia y Relaciones cola Empresa y coordinaos por Jesús Fernández Fernández na fase de prototipado y Andrea Martínez Noya, na fase d'incubación. Nel equipu participen persones de perfiles tan diversos como'l patrimoniu cultural, la educación, la organización d'empreses, la informática, el marketing o les finances.
La primer edición del Ecosystem Integration TalentUO Lab, celebráu na Universidá d'Uviéu en payares de 2022, cuntó cola participación de más de sesenta persones n'ocho grupos de trabayu. Cuatro d'esos proyectos son productos o servicios que tán na actualidá nel mercáu o en procesu de crear una startup como la cerveza Mayada, un escáner 3D de baxu costu, ICardioMonitor (un sistema de monitorización domiciliaria pa controlar la insuficiencia cardiaca) o xuna aplicación que sollerta la presencia de ciclistes. Otros dos proyectos d'ésitu nacíos nel llaboratoriu de 2022 fueron el CSA L'Armería que cuntó con una gran participación de la comunidá universitaria y el proyectu de divulgación científica PARANTAR del grupu d'investigación de la Universidá d'Uviéu que sigue n'activu.
