La Universidá d'Uviéu va acoyer dende mañana, 31 de mayu, hasta esti vienres, 2 de xunu, les X Xornaes Doctorales y les V Xornaes de Divulgación Científica del Grupu 9 Universidaes, nes que van participar 79 de los meyores doctorandos de diches universidaes. En concretu, alleguen a les xornaes aquellos estudiantes de doctoráu de les cinco cañes de la conocencia y que fueron escoyíos poles sos universidaes d'orixe pola calidá de les sos tesis, de próxima llectura. 

Estes xornaes, que se desenvuelven cada añu n'una de les universidaes del Grupu 9, cunten nesta edición como novedá cola obra de teatru Lloca Academia de la Ciencia, abierta al públicu y que va tener llugar nel Teatru Filarmónica'l miércoles 31 a les 19.30 hores. La obra ta escrita, producida y protagonizada por personal investigador de la universidá  y enceta, cola ayuda de dellos científicos pernomaos, la naturaleza del cuerpu humanu dende distintes disciplines. En concretu, participen nella José Manuel Montejo, Cuadonga Huidobro y Antonio Torralba, los trés del departamentu de Ciencies de la Educación; Beatriz Ramajo, de los Servicios Científicu Técnicos; Luis Terente, conservador del Muséu de Xeoloxía; María de los Ánxeles Fernández, del departamentu de Xeoloxía; y Ana Elisa Valdés, del Institutu Mistu de Biodiversidá. La entrada ye llibre hasta completar aforu. 

Les xornaes van ser inauguraes el miércoles a partir de les 16.30 hores, nun actu nel que va participar el rector de la Universidá d'Uviéu, Ignacio Villaverde; el vicerrector de Xestión Académica, José Miguel Arias; el secretariu xeneral del G-9, Jorge Martín, y la directora d'área de Doctoráu y Títulos Propios, Henar Pérez. Amás, el programa inclúi una conferencia del catedráticu de Bioquímica y Bioloxía Molecular de la Universidá de Murcia y unu de los principales divulgadores de ciencia del país, José Manuel López Nicolás, sobro  ‘La divulgación científica como ferramienta d'investigación'; presentación de los pósteres per parte de los doctorandos; xuna mesa redonda na que personal investigador de la Universidá d'Uviéu va encetar la ellaboración d'una tesis doctoral na frontera de la conocencia; un taller de comunicación; xuna entevista grupal na que trés post-doc van cuntar la so esperiencia y trayectoria tres la llectura de la so tesis doctoral; según la conferencia Concencia de  muyer, al cargu de Rosa Sainz, directora del Institutu d'Oncoloxía del Principáu d'Asturies.