Cuatro mozos van desenvolver una beca d'un añu en compañíes enllantaes en Colombia, Panamá, Chile y Bélxica | La iniciativa benefició a 34 alumnos dende l'añu 2018 | El 73% de los becarios participantes nel programa atópase trabayando, la metá na mesma empresa na que collaboraron
La Sociedá de Promoción Esterior Principáu d'Asturies SA (Asturex), en collaboración cola Fundación Universidá d'Uviéu (FUO), pon en marcha una nueva edición del Programa de Práctiques n'Empreses Asturianes con see nel esterior.
Al traviés d'esta sesta convocatoria, publicada a finales del pasáu añu, la sociedá otorgó 4 beques para Colombia, Panamá, Chile y Bélxica. Les práctiques van desenvolver mientres 12 meses, 1 de xunu de 2023 al 31 de mayu de 2024.
Los 4 mozos becarios que van empecipiar la so andadura internacional nes sedes de les empreses asturianes nel esterior fueron recibíos esta mañana na see de la Conseyería d'Empléu, Industria y Turismu, pol conseyeru y presidente de Asturex, Enrique Fernández, pola vicerrectora de Tresferencia y Relaciones cola Empresa, Begoña Cueto, pol director xeneral de Asturex, Bruno López, y pol director de la FUO, Santiago Fernández López.
Con esta iniciativa, Asturex tien como oxetivu sofitar a les empreses nel so procesu de internacionalización por aciu la puesta a disposición de mozos altamente cualificaos y especializaos en internacionalización empresarial, por que éstos de la mesma adquieran formación práctica nel oxetu de la so carrera universitaria.
Les beques van dirixíes a empreses y entidaes constituyíes nel Principáu d'Asturies, con sedes nel estranxeru, y con fuerte componente internacional.
Mientres el periodu de práctiques, el becariu va desenvolver el Plan de Formación presentáu pola empresa y que primeramente foi validáu por Asturex en materia de comerciu internacional. Igualmente, va realizar les xeres encamentaes pola sociedá pública, ente les que s'inclúin la realización d'estudios y notes de mercáu y la preparación de respuestes a consultes d'empreses asturianes y del país de destín.
Amás de preparar documentación económica y comercial sobro esi mercáu y la so área d'influencia, los becarios van collaborar na realización d'actividaes de promoción y na preparación, sofitu y siguimientu de misiones comerciales entamaes por Asturex.
Desque s'empecipió'l programa, nel añu 2018, concediéronse 34 beques a destinos como México, Chile, Colombia, Guinea Ecuatorial, USA, Senegal, Bahréin, Turquía, Guatemala, Reinu Uníu y l'India. Coles d'anguaño xubiríen a 38 les beques aprobaes.
La valoración de los becarios/as que pasaron pol programa ye altamente positiva: el 73% manifiesta que s'atopa trabayando anguaño, la metá d'ellos na mesma empresa onde llogró la beca. Igualmente, xuna amplia mayoría considera que la realización de la beca foi determinante pal llogru del puestu de trabayu actual, yá sía na mesma empresa onde cursó la beca, o n'otra distinta. Les persones beneficiaries de la beca nesti última edición son: Natalia Menéndez Hidalgo, Victoria Pérez Alonso, Emily Esther Kreuzer García y Alberto García Rodríguez.
