La nueva propuesta formativa, qu'aumenta nun 40% el númberu d'acciones, foi aprobada na Comisión Sectorial de Xerencies celebrada esta mañana n'Uviéu | El rector de la Universidá d'Uviéu fixo fincapié na importancia de celebrar esti tipu d'alcuentros “nos que poner de mancomún problemes y realidaes que compartimos les universidaes”. | El xerente de la Universidá de Murcia, Francisco José Cámara García, participa per primer vegada na xunta, tres la incorporación de la so institución al G-9 como universidá collaboradora
El Grupu 9 d'Universidaes (G-9) va amontar en daqué más d'un 40% la ufierta formativa conxunta empobinada al Personal d'Alministración y Servicios (PAS). Asina lo resolvieron na Comisión Sectorial de Xerencies celebrada esta mañana n'Uviéu, na qu'alcordaron programar nel próximu cursu un total de 66 cursos, frente a los 47 que se celebraron na edición anterior, ente que'l númberu de places va aumentar de 2.215 a 3.630. La decisión tómase una vegada analizaos los datos de la ufierta formativa online del pasáu cursu, que cuntó con 5.363 inscritos para les 2.215 places yá citaes.
L'informe de los responsables de formación de la PAS foi'l primeru de los puntos d'un orde del día que cuntó tamién con una sesión de trabayu sobro la LOSU y les sos implicaciones económiques, los premios de xubilación de la PAS, la xestión de la Seguridá Social énte'l futuru Estatutu de les persones en formación práctica nel ámbitu de la empresa, conocíu como l'estatutu del becariu. El rector de la Universidá d'Uviéu, Ignacio Villaverde, espresó'l so prestu por acoyer esta sectorial y fixo fincapié na importancia de celebrar estos alcuentros: “Les universidaes, y de forma bien especial les que conformamos el G-9, vivimos realidaes bien similares; los nuesos problemes son, en munchos casos, compartíos, polo que resulta fundamental que, nun ámbitu como ye'l de la xerencia o la xestión económica, analicemos de forma conxunta nuesa situación”, esplicó.
Nel alcuentru, nel que participó per primer vegada'l xerente de la Universidá de Murcia, Francisco José Cámara García, tres la incorporación de la so institución como universidá collaboradora del Grupu 9 d'Universidaes, alcordóse establecer un grupu de trabayu dependiente de la sectorial de xerencies de responsables de Recursos Humanos. Esti grupu va poner de mancomún les problemátiques internes de cada universidá y van compartir bones práctiques y propuestes de futuru.
Tocantes a la sesión sobro les implicaciones económiques de la LOSU nes universidaes, al cargu de Santiago Álvarez García, profesor de Facienda Pública y Sistema Fiscal Español de la Universidá d'Uviéu, analizáronse cuestiones qu'apaecen nel conteníu de la norma, como l'encamientu de que les comunidaes autónomes dediquen el 1% del PIB. De forma similar, manifestóse la esmolición esistente nes diez universidaes participantes sobro la xestión de la Seguridá Social nes persones receptores de beques o en práctiques, sobremanera no referío a l'aplicación del futuru estatutu del becariu.
La xunta concluyó con una sesión de trabayu na que s'analizó cómo les distintes universidaes enceten distintes necesidaes -informátiques, estructurales o de personal- nos periodos de vacaciones o zarros enerxéticos, según la xestión d'espacios nos campus.
