El freestyler Gabriel Sánzhez Poyal, Gazir, ye'l protagonista de la innovadora campaña de promoción que la Universidá d'Uviéu pon en marcha dende güei na rede social TikTok, una acción que se va estender hasta'l mes de mayu y que tien por oxetivu la captación d'alumnáu de fora d'Asturies, con especial interés nos países hispanofalantes. Sol lema Escueye'l to destín, escueye Universidá d'Uviéu y el eslogan curtiu Destín: Uniovi, la campaña enceta los motivos polos que Gazir, alumnu de Física de la institución asturiana, encamienta escoyer la Universidá d'Uviéu para cursar formación cimera. 

 

Factores como la ufierta formativa, los puntos fuertes d'Asturies como destín, el prestíu investigador de la institución, les facilidaes n'agospiamientu o les beques son dalgunes de les cuestiones nes que Gazir incide nun total de seis vídeos realizaos ensin guion. En cada unu ellos, l'artista improvisa en base a cuatro palabres escoyíes ente les fortaleces de la Universidá d'Uviéu.  Grabaos nos campus de Mieres, Xixón, El Cristu, Llamaquique y El Milán, los vídeos tienen menos d'un minutu de duración y van ser espublizaos na nueva canal de TikTok de la Universidá d'Uviéu cada quince díes. 

 

De forma paralela, la campaña va completar con otros seis vídeos que van afondar, de forma más concreta, naquellos estudios que pueden resultar curiosos pal alumnáu internacional. El máster de Física Avanzada; los estudios de xéneru; dalgún de los itinerarios billingües de la Universidá d'Uviéu, como'l casu de Turismu; el grau d'Inxeniería de Tecnoloxíes y Servicios de Telecomunicaciones; la Escuela Cimera de la Marina Civil o los graos de la Escuela Politécnica de Mieres son dalgunos de los puntos destacaos de la segunda parte de la campaña, que se va llanzar a partir del día 1 de marzu. 

 

L'acción, que surde de la iniciativa del Vicerrectorado de Internacionalización, pretende, en palabres del rector de la Universidá d'Uviéu, Ignacio Villaverde, "llegar a moces d'ente 15 y 18 años, que tán plantegándose salir de los sos llugares de residencia pa cursar o bien estudios completos o dalgún cursu". Pa ello, "escoyimos xuna plataforma, TikTok, que cunta con barganal de 1000 millones d'usuarios activos al mes y que ye especialmente popular ente la xente nuevo", manifestó. 

 

Pela so parte, el vicerrector de Internacionalización, Daniel Santos, esplicó "el gran potencial que tien el públicu hispanofalante pa la Universidá d'Uviéu". "Sabemos que la nuesa Universidá ye un destín d'especial atracción pal alumnáu de países llatinoamericanos y creemos qu'esta campaña puede ayudar a reforzar la marca y a atraer a nuevos estudiantes", manifestó. L'acción, amás, va sirvir pa l'atracción d'alumnáu d'otres rexones d'España. 

 

Gabriel Sánchez Poyal, Gazir, amosóse bien satisfechu pola so participación na campaña de promoción de la Universidá d'Uviéu: "Cuando me lo propunxeron nun duldar n'aceptar. A la fin, yo estudio equí, formo parte de la Universidá d'Uviéu y yera trabayar sobro daqué que conozo de primera mano". 

 

Gazir tien más de 293.000 siguidores en TikTok y más de mediu millón en Instagram, rede social na que van retrucar los conteníos de la campaña. Nacíu n'avientu de 2001, Gabriel Sánchez Poyal empezó dende bien nuevu nel mundu del freestyle y con solu 17 años d'edá ganó la Rexonal d'Alicante de la Red Bull Batalla en 2019. A partir d'ende, la so carrera como freestyler foi n'ascensu. Ganó la Nacional de Red Bull en 2021, el mesmu añu que s'alzó col títulu internacional de la Freestyle  Master Series. D'esa mesma lliga, fai tan solo 11 díes foi coronáu campeón d'España.