El rector d'Universidá d'Uviéu empecipia una visita institucional a México para estrechar llazos con universidaes azteques
Villaverde, acompañáu del vicerrector de Relaciones Institucionales y Coordinación, Humberto Rodríguez Solla, va caltener alcuentros con el rectores de la Universidá Nacional Autónoma de México y el Tecnolóxicu de Monterrey | L'oxetivu ye avanzar n'alcuerdos de collaboración estratéxica para compartir proyectos de mancomún tantu n'investigación como formativos, amás de promover les movilidaes del personal y estudiantáu
El rector de la Universidá d'Uviéu, Ignacio Villaverde, acompañáu del vicerrector de Relaciones Institucionales y Coordinación, Humberto Rodríguez Solla, empecipia güei un viaxe institucional a México que tien por principal oxetivu estrechar llazos y establecer nueves víes de collaboración coles universidaes mexicanes. En concretu, la delegación asturiana va caltener alcuentros con el rectores tantu de la Universidá Nacional Autónoma de Méxíco (UNAM) como del Tecnolóxicu de Monterrey (TEC de Monterrey), y con dellos representantes del empresariáu mexicanu.
L'axenda para mañana, 8 de febreru, empieza con una xunta col rector de la UNAM, Enrique Graue Wiechers. Nella, van avanzar na firma d'un futuru conveniu de collaboración que tien ente los sos oxetivos facilitar la movilidá y les estancies d'investigación de Personal Docente ya Investigador, Personal d'Alministración y Servicios, según l'intercambiu d'estudiantáu. Amás, va promover la participación conxunta en proyectos d'investigación.
El xueves, 10 de febreru, Villaverde y Rodríguez Solla van visitar el TEC de Monterrey, nun actu nel que ser van axuntar con Juan Pablo Murra, rector de Profesional y Posgrado; Arturo Molina, director del Institute of Advanced Materials for Sustainable Manufacturing; Arturo Santos, director de Tresferencia de Tecnoloxía; Alejandra María Vilalta Perdomo, director for International Academic Development & Global Initiatives, según dellos decanos y profesores investigadores. Ellí, va avanzase tamién na firma d'un nuevu conveniu que retome les relaciones col centru mexicanu y, como nel casu del conveniu cola UNAM, facilite les movilidaes de la comunidá universitaria.
Mientres el viaxe institucional, van producise, amás, distintes xuntes con empresariáu asturmexicano, según un alcuentru con miembros de la directiva del Banco Santander en Ciudá de México, ente los que va tar presente Arturo Cherbowski Lask, director xeneral de Universia México y unu de los mayores espertos nel campu de la educación cimera en México.
Villaverde estimó de mano l'interés que les distintes instituciones mexicanes amosaron nesta visita de los representantes de la Universidá d'Uviéu y manifestó la importancia de "estrechar llazos y poner en marcha aliances con universidaes que, por trayectoria, esperiencia y prestíu, pueden apurrir enforma a la nuesa institución".
Galería d'imaxes
