José Ángel Baños, cola obra Más perenne que el bronce: el discurso autopoético en la lírica española contemporánea, llogró güei el VIII Premiu Internacional d'Investigación Lliteraria "Ángel González", que convoca la Universidá d'Uviéu al traviés de la cátedra que lleva'l nome del poeta uvieín. El fallu del xuráu diose a conocer na Aula Rector Alas del Edificiu Históricu de la Universidá d'Uviéu, nun actu nel que se presentó amás Tu canción entre sus canciones. José Agustín Goytisolo y la música, de Francisco Javier Ayala, obra ganadora de la pasada edición d'esti galardón.

 

El xuráu del Premiu Internacional d'Investigación Lliteraria "Ángel González", presidíu por María Pilar García Cuetos, vicerrectora d'Estensión Universitaria y Proyección Cultural, alcordó conceder el galardón a José Ángel Baños, por Más perenne que el bronce: el discurso autopoético en la lírica española contemporánea. El trabayu premiáu enceta los desafíos de la autorreflexión na poesía española, encara l'asignatura pindia del rastrexu históricu de la autorreflexión y achisba les composiciones rexíes pol impulsu autopoético na lliteratura española dende la Edá Media hasta'l sieglu XX.

 

El xuráu consideró que la obra "dende una rigorosa fundamentación teórica, apurre les ferramientes necesaries pa la comprensión de la autorreflexión, alluma puntos ciegos y rellena vacíos conceptuales nel estáu actual de los estudios sobro esta práctica discursiva; empezando per acuñar razonadamente la denominación preferente,  de cuenta que'l términu «autopoética» mueve a la tradicional noción de «metapoesía»".  El xuráu concluyó que la investigación supon "xuna contribución bien sustantiva al campu de conocencia, fundamentalmente pol sólidu aparatu teóricu qu'apurre y que se revela bien oportunu pa la llectura a una nueva lluz de la hestoria poética de la segunda metá del sieglu XX".

 

Al Premiu Internacional d'Investigación Lliteraria "Ángel González" pueden allegar trabayos en llingua española, de calter teóricu o críticu, sobro una tema tocante a la poesía hispánica de los sieglos XX y XXI. L'oxetivu d'esti galardón ye incentivar la conocencia, espardimientu, formación ya investigación sobro aspeutos rellacionaos cola obra del poeta asturianu, la creación lliterario y artístico y los estudios humanísticos.

 

El premiu ta impulsáu pola Cátedra Ángel González de la Universidá d'Uviéu, cola collaboración del Gobiernu del Principáu d'Asturies. José Ángel Baños va recibir los 5.000 euros como ganador del galardón y va poder amás ver reconocíu y publicáu el so trabayu nuna editorial que garantice'l so espardimientu nacional ya internacional.

 

El xuráu encargáu de fallar el premiu tuvo presidíu pola vicerrectora d'Estensión Universitaria y Proyección Cultural, María Pilar García Cuetos, y actuaron como vocales la directora de la Cátedra Ángel González, Araceli Iravedra; Juan José Lanz, de la Universidá del País Vascu; Alfredo Saldaña, de la Universidá de Zaragoza y Carmen Morán Rodríguez, de la Universidá de Valladolid.

 

José Ángel Baños Saldaña, formáu na Universidá de Murcia, ye doctor en Lliteratura Española. En 2018, llogró l'I Premiu d'Investigación Poética Pablo García Baena, otorgáu pola Universidá de Córdoba y que supunxo la publicación del so ensayu Desautomatización y posmodernidad na poesía española contemporanea: la tradición grecolatina y la Biblia (UCOPress, 2019). Amás, publicó capítulos de llibros en diverses editoriales académiques y artículos d'investigación en revistes d'ámbitu nacional ya internacional.