La investigación desenvuelta na Universidá d'Uviéu ganó terrén nos últimos años. L'aumentu de la producción científica y la mayor repercusión internacional de los trabayos de los investigadores asturianos favorecieron que la institución académica esguile puestos en dalgunos de los rankings más prestixosos.

La edición de 2013 del Shanghai Ranking Expanded, ellaboráu pola Universidá de Granada retrucando los cálculos del Academic Ranking World Universities (ARWU), asitia a la Universidá d'Uviéu nel puestu 14 ente toles universidaes públiques y privaes españoles. La meyora siguida qu'esperimentaron nos últimos años dalgunos de los principales indicadores que computa l'estudiu dexó a la institución asturiana dir remontando un puestu cada añu ente 2011 y 2013.

El documentu, ellaboráu por espertos aplicando los mesmos cálculos utilizaos pa configurar el ‘Top Shanghai' coles 500 meyores universidaes del mundu, constata una progresión positiva nel númberu de publicaciones en Science y Nature nos últimos años, y tamién revela una medría nel númberu d'artículos indexados pol Science Citation-Index Expanded y Social Science Citation Index.

La institución académica asturiana asitiase por delantre de centros universitarios de referencia n'España como la Universidá Politécnica de Madrid, la Universidá de Salamanca, la Universidá Carlos III o la Universidá de Cantabria, por citar dalgunes.

La versión espandida del ranking de Shanghai, ellaborada pol profesor Domingo Docampo, realiza tamién un estudiu ente les universidaes iberoamericanes (incluyíes les españoles), nel que la Universidá d'Uviéu figura na posición 29.

Tamién el National Taiwan University Ranking (NTU) confirma la progresión positiva de la investigación y la docencia de la Universidá asturiana hasta algamar nel añu 2013 la séptima posición ente les universidaes españoles y el puestu 369 a nivel mundial. N'ediciones anteriores, la Universidá d'Uviéu ocupaba'l llugar 11 a nivel nacional y el 461 nel ranking internacional (añu 2012).

Polo que respecta a los estudios nacionales, el ranking sobre la producción y productividá n'investigación de les universidaes públiques españoles, que cada añu publicase na revista Psicothema, asitia a la institución académica asturiana nel puestu 14 en producción total. Esti estudiu analiza distintos indicadores, como los tramos d'investigación, ítem nel que la Universidá d'Uviéu figura nel puestu 11 de 48 na última edición del estudiu, que va ser publicada llueu.

El númberu de publicaciones d'investigadores universitarios en revistes d'impactu aumentó un 30% en cuatro año

Les acciones del Campus d'Excelencia Internacional incidieron positivamente na meyora de la producción científica de la Universidá d'Uviéu, con una medría del 33% dende 2009 hasta 2012, siendo destacable el fechu de que, por permediu, el 50% de les publicaciones realizáronse en revistes asitiaes nel primera cuartil (Q1). La productividá científica, midida como'l númberu d'artículos per investigador, amontóse tamién un 30% dende 2009. Esti aumentu reflexóse igualmente nel númberu de sexenios per investigador, que pasó de 1,50 en 2009 a 1,87 nel añu 2013.

El númberu d'autores de la Universidá d'Uviéu con siquier un artículu en dalguna publicación con factor d'impactu JCR foi creciendo de manera sostenida. En 2012, últimos datos disponibles, contabilizáronse un total de 1.363 artículos en revistes con JCR, un 14% más que l'añu anterior, escritos por 1.235 autores distintos de la Universidá d'Uviéu.

La internacionalización promovida dende'l CEI por aciu convocatories de movilidá internacional tien tamién el so reflexu nel aumentu del númberu de publicaciones que la Universidá d'Uviéu realiza conjuntamente con investigadores d'otros países (558 en 2012 frente a 364 en 2009) y nel númberu d'investigadores colos que se collabora, fundamentalmente d'EEXX, Reinu Uníu, Francia, Italia y Alemaña, qu'esperimentó una medría bien notable dempués del llogru del sellu d'excelencia.

Polo que respecta al númberu de cites recibíes poles publicaciones, en 2012 foi'l doble qu'el de la media de les publicaciones españoles. Les resultancies de la investigación nes árees d'especialización de Ad Futurum (Enerxía, Medioambiente y Cambéu Climáticu, y Biomedicina y Salú) refundien un destacable cambéu d'enclín tres la consecución del sellu de CEI, una y bones la medría nel númberu de publicaciones indexadas pasa de ser un 33% ente 2008 y 2010 (antes del CEI) a un 73% ente 2010 y 2012 (dempués del CEI). El mesmu efectu detéctase si mide'l factor d'impactu añal acumuláu, qu'aumenta de manera esponencial dempués de 2010.

Bioterio de la Universidá d'Uvieu.