La Universidá d'Uviéu abrió esta mañana oficialmente'l cursu académicu 2012-2013 nun actu con más d'un centenar de claustrales revistíos y la presencia, per primer vegada, del presidente del Principáu d'Asturies, Javier Fernández. El Rector de la Universidá d'Uviéu, Vicente Gotor Santamaría, presidió'l solemne actu celebráu nel Paraninfu d'Edificiu Históricu acompañáu poles principales autoridaes rexonales y representantes sociales.

El Secretariu Xeneral de la Universidá, Ignacio González del Rey, foi l'encargáu de tomar la palabra en primer llugar pa dar llectura a la memoria añal d'actividaes de la institución académica. De siguío, la llección inaugural del cursu 2012-2013 corrió a cargu del Catedráticu de Derechu Constitucional, Ramón Punset, que recibió una sonora ovación tres la so disertación sobre La reforma de la Constitución.

Vicente Gotor empezó la so intervención amosando la total llealtá institucional que la Universidá va caltener escontra'l Gobiernu del Principáu pa marcar una sienda de collaboración, que dexe siguir sumando esfuerzo ante la complicada coxuntura económica que travesamos.

Acabante empecipiar el so segundu mandatu, el Rector tamién tuvo palabres de reconocencia pa los universitarios qu'anovaron el so enfotu nél nes pasaes elecciones al Rectoráu. Gotor sorrayó la so intención de consolidar un plan estratéxicu que nos últimos cuatro años apostó por una proyección internacional de la Universidá, foi pioneru a la d'enllantar y consolidar Bolonia y afitó la excelencia docente ya investigadora como meta de la institución académica.

Ante la situación de crisis qu'afara'l país y los retayos qu'aquexen a toles alministraciones, el Rector estimó l'esfuerzu que tán realizando tolos miembros de la comunidá universitaria y aportunó en "reivindicar el papel de la universidá como serviciu públicu pa garantizar la igualdá d'oportunidaes."

El presidente del Principáu, Javier Fernández, garantizó que "la Universidá nun va tar sola na consecución de los sos oxetivos. Vamos Asumir xuntos l'esfuerzu de contención de gastu que por responsabilidá social tamos llamaos." El presidente sorrayó'l la importancia de la Universidá como líder del texíu investigador de la rexón y destacó que "la inversión en conocencia ye una inversión en progresu."