El profesor d'Estadística y hasta la fecha director de la Área d'Orientación y Accesu de la Universidá d'Uviéu, Luis Rodríguez Muñiz, ye'l nuevu vicerrector d'Estudiantes y Empléu, cargu nel que sustitúi a Susana López Ares, que'l vienres formalizó'l so cese nel cargu.

El nomamientu de Rodríguez Muñiz garantiza la continuidá na xestión del Vicerrectorado dientro d'un equipu compactu, integráu tamién polos directores d'Área de Servicios Universitarios, Eduardo Rodríguez Enríquez; Empleabilidá, Guillermo Pérez-Bustamante; y Colexos Mayores, José Alejo Rueda.

Luis Rodríguez Muñiz tuvo al frente de la Área d'Orientación y Accesu de la Universidá d'Uviéu mientres los últimos trés años, polo que tien una absoluta conocencia del funcionamientu del Vicerrectorado d'Estudiantes y Empléu. Dende'l so cargu, Rodríguez Muñiz participó viviegamente na adaptación al Espaciu Européu d'Educación Cimera (EEES) y encargóse de coordinar l'accesu a la Universidá, incluyida la implantación de la nueva Prueba d'Accesu a la Universidá (PAU), qu'entró a valir el pasáu cursu, y la PAU pa mayores de 25, mayores de 45 y mayores de 40 años con esperiencia profesional. Amás, ye'l responsable del programa d'orientación universitaria, un elementu fundamental na collaboración con tolos niveles de la Enseñanza Secundaria.

El nomamientu de Rodríguez Muñiz respuende al deséu del Rectoráu de garantizar un relevu consensuáu col equipu del Vicerrectorado d'Estudiantes y Empléu pa siguir col trabayu que se vien desenvolviendo en toles árees, daqué especialmente importante nestos momentos, a les puertes de la selectividá, que les sos convocatories celebraranse per primer vegada anguaño a principios de xunu y xunetu.