La Universidá d'Uviéu coordina'l programa européu Leonardo da Vinci de tresferencia d'Innovación New Teachers for New Competences (Nuevos Formadores pa Nueves Competencies), que tien por oxetivu principal ufiertar al profesoráu ferramientes pedagóxiques que-yos dexen formar al so alumnáu nes competencies non formales ya informales demandaes poles empreses.

La presentación del programa, presidida pola vicerrectora de Internacionalización y Cooperación al Desenvolvimientu, realizose nel contestu de la xunta inicial de los socios del programa. Al pie de la Universidá d'Uviéu participen nesta actuación seis instituciones europees (Grecia, Italia, Austria, Dinamarca y España) y la Fundación Metal Asturies.

Enmarcáu dientro del Sub-Programa "Leonardo da Vinci" del Programa d'Aprendizaxe Permanente, NTNC ye un proyectu de "Tresferencia d'Innovación dependiente de la OAPEE-Organismu Autónomu de Programes Educativos Europeos (Axencia Nacional, Madrid). Como tal, NTNC tien el so orixe nel proyectu TOOLS TRAINING (2004) suponiendo non yá la so tresferencia a nueves redolaes europees sinón, igualmente, un desenvolvimientu, meyora y actualización de los sos productos. El proyectu tien ente los sos oxetivos:

• Identificar bones práctiques en "técniques y metodoloxíes d'hibridación ya intercambiu" ente les empreses y los sistemes de Formación Profesional de cada país participante.
• Identificar y analizar los contestos granibles de les empreses asi como los principales valores demandaos poles empreses nos sos trabayadores.
• Identificar y analizar les competencies tresversales más importantes en base a los contestos granibles y valores de les empreses y diseñar los sos estándares en términos de "resultancies del aprendizaxe" (conocencies, habilidaes y competencies).
• Diseñar l'itinerariu formativu y desenvolver el material didáctico pa cualificar al profesoráu na movilización y valorización de les competencies tresversales ente'l so alumnáu. Esta actividá va suponer la tresferencia y adaptación del material ellaboráu nel proyectu TOOLS TRAINING.
• Testar los recursos didácticos al traviés del so implementación en formatu dixital.

NTNC va ser desenvueltu por un partenariado compuestu por 7 organizaciones con particular interés na meyora continua de la Formación Profesional:

• Universidá d'Uviéu-España: entidá promotora.
• Fundación Metal Asturies-España: sociu coordinador.
• Fondo Formación Euskadi-España: sociu promotor del proyectu TOOLS TRAINING, precursor y orixe del proyectu NTNC.
• BEST-Austria: centru con 24 años d'antigüedá nel ámbitu de la formación profesional y orientación llaboral.
• LINK CONSULTING-Italia: consultoría d'empreses ya instituciones públiques.
• IDEC-Grecia: empresa de consultoría y formación n'árees de ISO-9001, software y multimedia, e-learning, e-business, e-commerce, telecomunicación y redes.
• AOF-Dinamarca: centru de formación dedicáu al coaching individual asi como al desenvolvimientu de cursos colectivos.

NTNC cunta con un presupuestu total de 381.043€ de los que 259.245,12€ tán subvencionaos pol Programa d'Aprendizaxe Permanente. El proyectu tien una duración de 2 años, dando entamu'l 1 d'Ochobre de 2011 y rematando el 30 de Setiembre de 2013.