L'Atles Temáticu d'España contien más de 2.000 mapes y planos temáticos interpretaos que describen y espliquen aspeutos tan variaos del estáu como la distribución de la población y les sos característiques, la forma de les ciudaes, el so procesu de construcción, los paisaxes rurales, les actividaes agraries y ganaderes desenvueltes nellos, la evolución de les infraestructures, los espacios económicos, industriales, comerciales…

La directora del departamentu de Xeografía, Amalia Maceda, definió la obra, en la que tamién participó, como "un finxu nel quefer de los xeógrafos españoles". Tratase d'un trabayu llamáu a ser referencia pa la conocencia de la realidá xeográfica d'España, una ferramienta pa la investigación y la docencia. El catedráticu eméritu Francisco Quirós Linares y el profesor Titular de Xeografía Humana, Gaspar Fernández Cuesta, dirixieron esti trabayu d'un grupu de 25 especialistes, venceyaos na so mayoría a la Universidá d'Uviéu.

Esti Atles, presentáu ayeri llunes nel Paraninfu del Edificiu Históricu de la Universidá, consta de cuatro tomos que rematen amás el proyectu global empecipiáu cola publicación d'otros dos volumes, designaos como Atles Xeográficu d'España.