Les muyeres son una sensible mayoría nes aules universitaries. Sicasí, les cifres se voltien al ver los datos de los estudiantes qu'estudien una inxeniería o un grau técnicu como arquitectura. El grupu d'Analís Sociolóxicu y Cultural de los Procesos Escolar y Educativu (ASOCED) centra la so última investigación n'esplicar les razones poles que les muyeres prefieren nun decantase polos estudios tecnolóxicos.

Los espertos y espertes del Departamentu de Ciencies de la Educación encuestaron a más de 5.000 estudiantes de Secundaria y universitarios y testaron les impresiones de padres/madres y docentes

La perspectiva de xéneru na educación ye una de les llínees d'investigación que dende va años desenvuelve esti equipu nel Departamentu de Ciencies de la Educación de la Universidá d'Uviéu. El so oxetivu actual ye determinar si'l xéneru xuega un papel na elección d'estudios tecnolóxicos. Pa ello, el proyectu Influencia de la autoeficacia nel rendimientu académicu y na elección d'estudios científicos en Secundaria y Universidá, financiáu pol Ministeriu d'Economía y Competitividá, encuestó a más de 5.000 estudiantes asturianos y testó amás les opiniones de madres/padres y docentes.

Anguaño les muyeres son una mayoría clara nes titulaciones d'humanidaes, ciencies sociales y xurídiques y tamién nes carreres biosanitaries, pero la so presencia n'inxenieríes cai de manera llamativa.

Les primeres conclusiones que refundia l'estudiu revelen que les creencies de autoeficacia paecen condicionar en bona midida la decisión de les moces a la de nun escoyer una carrera puramente técnica. "Por dalguna razón elles piensen que nun van ser capaces de rindir bien neses materies, anque les resultancies d'analises de los datos de la PAU confirmen que mozos y moces tienen un rendimientu similar nesti campu", esplica Carmen Rodríguez, una de les investigadores del grupu. Esi sentimientu de sentise menos competentes neses árees inflúi nel interés que les alumnes amuesen por eses titulaciones y por tantu tamién na so elección. Ye más, eses menores creencies de autoeficacia siguen amosándoles les moces que cursen estudios universitarios de inxeniería si se comparen colos sos compañeros varones.

Xuntu al factor de la autoeficacia, los investigadores del Departamentu de Ciencies de la Educación de la Universidá d'Uviéu comprobaron que les mires de resultancies tamién xueguen un papel importante na decisión de qué tipu d'estudios escoyer. Les mires de los homes suelen ser más altes tocantes a salariu o puestu de relevancia nel mundu llaboral, ente que les muyeres sopesen otres consecuencies de la so elección y valoren otros alicientes al pensar nel trabayu que-yos gustaría desempeñar.

Amplia repercusión internacional

L'amuesa de la investigación desenvuelta mientres los últimos trés años inclúi a más de 4.000 alumnos de 4º de la ESO y 1º de Bachilleratu de 74 centros del Principáu y a un millar d'estudiantes universitarios. Amás, estableciéronse grupos de discutiniu directu con padres, madres, profesores, profesores, alumnes y alumnos pa intentar conocer les razones que condicionen la elección final de los chavales. Ello ye que unu de los enfoques en que se centra la investigación, anque los datos inda nun tán zarraos, ye analizar en qué midida la formación que recibieron los proxenitores inflúi na qu'escueyen los sos fíos y fíes.

La implantación de programes d'orientación vocacional nos institutos puede ser una de les víes por que la variable de xéneru pierda pesu na elección d'estudios. "Tendríen de empezar a funcionar nos primeros años de la Secundaria, porque si se dexa dir más allá los patrones yá tán demasiáu asitiaos como p'alterialos", remarca Carmen Rodríguez.

La investigación desenvuelta dende ASOCED sigue la llínea de la Teoría Social Cognitiva de Desenvolvimientu de la Carrera Vocacional, un enfoque que n'España nun suel aplicase nel campu de la educación. La relevancia de los datos y conclusiones llograos supunxeron que n'apenes unos meses casi una docena de publicaciones d'impactu especializaes publicaren o aceptaren artículos rellacionaos col proyectu.

Equipu investigador

• José Vicente Peña Calvo
• Susana Torío López
• María del Carmen Rodríguez Menéndez
• Carmen María Fernández García
• Jesús Hernández García
• Mercedes Inda Caro
• Omar García Pérez
• Sara Rodríguez Pérez