Estudiantes de los cursos pa mayores de la Universidá d'Estremadura atopen esta selmana n'Asturies dientro d'un plan d'intercambiu col so equivalente na Universidá d'Uviéu, el PUMUO, dempués de que los estudiantes de la institución asturiana visitaren Estremadura'l mes pasáu.

Nes actividaes participen 26 alumnos, mayores de 55 años, que mientres los trés primeros díes recibieron delles clases reglaes –sobre temes escoyíes por ellos mesmos– y visitaron los monumentos prerrománicos de Santa María del Naranco y San Miguel de Lliño, el cascu históricu d'Uviéu, la Catedral y la Cámara Santa, según Ribesella y l'ermita de la Guía.

Mañana xueves, el grupu va conocer los distintos espacios del Edificiu Históricu de la Universidá d'Uviéu, ente que pela tarde ta previstu qu'allegue a la proyección de la película Metrópolis, de Fritz Lang, nel Teatru Campoamor, cola interpretación de la banda sonora en directu per parte de la Orquesta Uviéu Filarmonía, una actividá entamada pol Vicerrectorau d'Estensión Universitaria y Comunicación. El programa d'intercambiu va rematar el vienres coles visites al cascu históricu d'Avilés, al Centru Niemeyer y a Cuideiru.

PUMUO ta empobináu preferentemente a persones mayores de 50 años y la so finalidá ye abrir un espaciu d'alcuentru y participación social a un sector de la población que, disponiendo de tiempu llibre, deseya incorporase al aprendizaxe y a la formación siguida que la institución universitaria puede ufiertar.