El Vicerrectorado d'Estudiantes y Empléu publicó la información estadística sobre les resultancies de la preinscripción n'estudios de Grau con llende de places pal cursu 2011-2012, correspondientes a la primer axudicación. Según esprendese d'esos datos, producióse un amenorgamientu del volume xeneral de solicitúes pa cursar estudios con llende de places, con respectu al cursu anterior. Dende'l Vicerrectorado apúntase qu'esto puede debese a "disponer de notes de corte de referencia del cursu 2010-2011, cosa que nun asocedió'l cursu pasáu. Esto produció un aumentu xeneralizáu nel númberu de preinscripciones en toles universidaes españoles qu'ufiertaben estudios con llende".

Constátase coles mesmes que los estudios de Medicina y el restu de los de Ciencies de la Salú tienen les notes de corte más altes, al igual que n'años anteriores. Na caña de Ciencies Sociales y Xurídiques, baxa sicasí la nota de corte.

Dende'l martes, 12 de xunetu y hasta el vienres 15, ta abiertu'l plazu pa formalizar la matrícula correspondiente a esta primer axudicación. Los solicitantes que s'atopen n'espera tienen de permanecer sollertes a les próximes axudicaciones. L'alumnáu qu'optara por estudios ensin llende de plaza va poder realizar la so matrícula hasta'l 9 de setiembre, en tolos casos, al traviés d'internet.