La Universidá d'Uviéu convida a redescubrir la República Democrática Alemana (RDA) al traviés d'una esposición, un ciclu de cine y una docena de curtiumetraxes. El vicerrectorado d'Estensión Universitaria, Cultura y Deportes presenta na sala d'esposiciones del Edificiu Históricu l'amuesa ¿El mundu feliz de la dictadura? Poder políticu y vida cotidiana na RDA, una completa radiografía n'imaxes sobre Alemaña del Este, que se va completar a partir del 15 de setiembre col ciclu de cine ‘Al otru llau del muriu'. L'actu d'inauguración cuntó cola presencia del vicerrector d'Estensión Universitaria, Vicente Domínguez, y cola coordinadora de la esposición, Anna Pelka.

L'amuesa, comisionada pola Fundación pal Estudiu de la Dictadura del SEI y la revista Stern, propón un viaxe nel tiempu de la mano del fotógrafu Harald Schmitt, corresponsal mientres munchos años de Sternen la RDA, y del historiador Stefan Wolle, nacíu en Tope del Saale. La esposición va permanecer abierta al públicu del 5 al 25 de setiembre.

Como complementu, na mesma sala d'esposiciones, va proxectase una selección de curtiumetraxes esperimentales y d'animación sol títulu Curtiumetraxes na RDA. Producción estatal ya independencia. Ente otres xoyes podrán vese Ent-oderweder (Unu o Otru), de Bruno Böttge; Sirenen (Les Serenes) y Kontraste (Contrastes), de Klaus Georgi;y diverses propuestes d'autores independientes.

El ciclu de cine de la RDA ‘Al otru llau del muriu', una fascinante amuesa del cine que se faía y consumíase dientro de la RDA proveniente de la gran productora estatal que fueron los Estudios de la DEFA (Deutsche Filme- Aktiengesellschaft), empieza'l 15 de setiembre cola primer película realizada na Alemaña ocupada tres la Segunda Guerra Mundial (Die Mörder sind unter uns).

A lo llargo d'un mes, el Salón d'Actos de Cajastur n'Uviéu va proxectar,los xueves a les 20:00 hores, distintos títulos qu'intenten ufiertar una visión panorámica de la vida cotidiana na RDA, con relación tantu al contestu históricu como a la estética del momentu, fundamental pa entender la obra de directores como Gerhard Klein, Lothar Warneke o EgonGünther, y de temática tan variada como la condena al nazismu y la necesidá d'enxuiciar a los criminales de guerra, la opresión del individuu, el conformismu político y social o la emancipación de la muyer. Esti ciclu, nel que collaboren Cajastur y Goethe Institut, ciérrase'l 20 d'ochobre cola última película producida pola DEFA tres la cayida del Muriu, darréu antes de la reunificación política (Die Architekten).

La mirada sobre la RDA abre la ufierta d'Estensión Universitaria pa esti nuevu cursu fiel al espíritu d'averar la meyor cultura a la sociedá asturiana.