La Universidá d'Uviéu presenta'l vienres, 6 de mayu, el nuevu Centru Internacional de Posgráu. L'actu, al que ta convidada tola comunidá universitaria, el Conseyu Social, el Gobiernu del Principáu y les empreses que participen na nueva ufierta de másteres universitarios, va celebrarse a les 12:00 hores na Aula Magna de la Universidá d'Uviéu.

El Centru Internacional de Posgráu, una de les grandes apuestes del Campus d'Excelencia Internacional, foi aprobáu'l pasáu mes d'avientu en Conseyu de Gobiernu de la institución académica asturiana. La so misión ye xestionar de forma coordinada la ufierta de másteres universitarios, programes de doctoráu, títulos propios y formación continua.

La primer actuación d'esti centru foi la ellaboración d'un nuevu catálogu de másteres universitarios de calter internacional y interuniversitario, qu'amás potencien la collaboración de la empresa en docencia, práctiques y cotutela. Les vicerrectores de Campus d'Excelencia Internacional, Paz Suárez Rendueles, y d'Ordenación Académica y Nueves Titulaciones, Covadonga Betegón, van informar sobre les actuaciones previstes nel CIP y l'anovada ufierta de másteres universitarios, na que s'inclúin dobles titulaciones con universidaes estranxeres y nueves propuestes d'Erasmus Mundus.

La presentación de los nuevos másteres universitarios va cuntar cola presencia de los coordinadores de los programes y de representantes de les instituciones y empreses que participen y patrocinen más d'una ventena de másteres universitarios.