Qué modelos organizativos y alministrativos pueden embrivir l'impactu sobre la calidá de los servicios públicos en plena dómina de retayos. Cuálos seríen los organigrames y organismos que procuren una alministración más eficiente ensin asumir un altu costu social. Son dalgunos de los planteamientos de base qu'un equipu d'investigadores de la Universidá d'Uviéu, lideráu pol catedráticu del Departamentu de Derechu Públicu Leopoldo Tolivar, analiza nel proyectu Modelos xurídicu-organizativos de optimización de les prestaciones esenciales del estáu de bienestar, financiáu pol Ministeriu d'Economía y Competitividá.

La fondura de la crisis económica provocó importantes retayos de fondos en materies como sanidá, educación y bienestar social y desencadenó una batería de reformes lexislatives qu'afecten directamente a estos servicios públicos. Los espertos plantegen un analís de la efectividá real d'esos cambeos a la de procurar un aforru a les arques públiques pa proponer nuevos modelos organizativos que devalúen lo menos posible l'atención que reciben los ciudadanos.

Los profesores del Departamentu de Derechu Públicu plantegen nuevos modelos que devalúen lo menos posible la calidá de los servicios públicos

"Tratar de trazar un esquema burocráticu mínimu que dexe nun mancar sensiblemente, partiendo de lo inesorable de les decisiones polítiques, los servicios públicos que garanticen el bienestar social de los ciudadanos", esplica Leopoldo Tolivar. Unu de los retos del proyectu ye la continua realidá cambiante a la que s'enfrenten el investigadores. "Movemos nun terrén de sables moventibles porque les reformes y contrarreformes lexislatives son constantes, casi diaries", remarca'l catedráticu.

La reforma del Réxime Local, la nueva llei educativa, los decretos de copago de les melecines o la suspensión indefinida de la llei de Dependencia son dalgunes de los cambeos lexislativos de caláu que'l so impactu van analizar los investigadores pa describir alternatives que nun pasen factura a la calidá de la sanidá, la educación y los servicios sociales.

La privatización de servicios públicos ye unu de los puntos álgidos del alderique públicu y l'equipu d'espertos encara tamién l'estudiu de la so viabilidá y les sos consecuencies. Ello ye que ésti nun ye'l primer proyectu que sigue esta llínea, la so investigación sobre Xestión privada de servicios públicos de salú: incidencia na calidá prestacional y nos derechos d'usuarios y pacientes topetó de planu col intentu de privatizar la construcción y xestión de dellos hospitales en Madrid. "Naquel momentu prediximos y recoyimos nun llibru les posibles consecuencies xurídiques d'eses decisiones, de les que por desgracia agora somos testigos", señala Tolivar.

Les conclusiones d'esi primer estudiu cuestionen la eficacia de la privatización de la sanidá nel terrén xurídicu y tamién nel económicu. Amás, parense en cuestiones que tienen un impactu directu ya individual sobre cada paciente como, por casu, la protección de datos privaos y sensibles como les hestories clíniques.

Equipu investigador:

• Leopoldo Tolivar Alas
• Miriam Cueto Pérez
• Eva María Menéndez Sebastián
• Javier Junceda Moreno (Universidad Internacional de Catalunya)
• Alejandra Boto Álvarez