Un total de 130 especialistes na obra de Miguel de Cervantes, procedentes d'universidaes de too el mundu, van participar nel VIII Congresu Internacional de l'Asociación de Cervantistas, que se va celebrar na Biblioteca de Humanidades "Emilio Alarcos" del Campus del Milán del llunes 11 al vienres 15 de xunu, entamáu pola Asociación de Cervantistas, la Universidá d'Uviéu y la Cátedra Emilio Alarcos.

La inauguración va tener llugar el llunes, a les 10:00 hores. La conferencia inaugural, a les 10:30 h, va tar a cargu del catedráticu de la Universidá Autónoma de Barcelona Francisco Rico, autor de la principal edición crítica del Quixote, ente que la conferencia de clausura pronunciarala el catedráticu de la Universidá de Oxford Edwin Williamson, el vienres día 15, a les 18:30 hores, nel Paraninfu de LAUDEO Centru Cultural d'Estensión Universitaria (Edificiu Históricu).

Tratase d'un congresu "de primer orde nel ámbitu internacional", en palabres de Vicente Domínguez, vicerrector d'Estensión Universitaria y Comunicación, que lo presentó en rueda de prensa al pie de Emilio Martínez Mata, presidente del Comité Organizador, y Josefina Martínez, directora de la Cátedra Emilio Alarcos. Pa Martínez Mata, el fechu de que participen 15 investigadores de la Universidá d'Uviéu "reflexa l'interés na obra de Cervantes y la vitalidá de los grupos d'investigación d'esta Universidá". Pela so parte, Josefina Martínez destacó qu'esti congresu va axuntar "a los más conspicuos cervantistas" y va dexar "qu'en tiempos convulsos fálese de la lliteratura como mediu p'atopar la verdá ente los seres humanos".

Dientro del programa d'actos, el martes, 12 de xunu, a les 12:30 h, va llevase a cabu un homenaxe a Alberto Blecua, primer presidente de l'Asociación de Cervantistas, que va tar presidíu pol director de la Real Academia Española, José Manuel Blecua.