La Comisión d'Igualdá de la Universidá d'Uviéu quedó constituyida esta mañana so la presidencia del rector, Vicente Gotor. Esti órganu forma parte de la acabante crear Unidá d'Igualdá de la institución académica asturiana y tien como función principal la ellaboración del Plan d'Igualdá, amás de la propuesta y supervisión de toles iniciatives que fomenten los valores d'igualdá nel ámbitu académicu.

Amás del rector, formen parte de la comisión la Delegada del Rector pa la Unidá d'Igualdá, Carolina Martínez Moreno; el xerente de la Universidá, Eusebio González; y el vicerrector de Profesoráu, Departamentos y Centros, Julio Antonio González, como miembros del equipu de gobiernu de la Universidá. Col propósitu de dar cabida a tolos estamentos y colectivos qu'integren la comunidá académica y a los que va afectar el Plan d'Igualdá, completen esti órganu Rita Nespral y Enedina Moradiellos (PAS); pol Personal Docente ya Investigador (PDI): Esther Álvarez, Pedro Riera y Juan Ángel Martínez; y como representantes de les organizaciones sindicales: Cristina Fernández (SIPU), Isabel Antón (CCOO) y Gemma Campu (UXT).

Carolina Martínez esplicó a la comisión les llínees de trabayu empecipiaes na Unidá d'Igualdá, con un analís sobre la situación nes universidaes españoles. El 73% de les 50 universidaes públiques crearon una unidá d'igualdá o órganu equivalente, y daqué menos de la metá disponen d'un plan d'igualdá aprobáu.

El primer oxetivu de la Comisión d'Igualdá de la Universidá d'Uviéu ye empecipiar la ellaboración del Plan d'Igualdá, que va tener ente les sos exes centrales la sensibilización y creación d'un estáu d'opinión favorable a la igualdá d'oportunidaes, la organización de les condiciones de trabayu con perspectiva de xéneru, la promoción de midíes que garanticen una representación equilibrada nos distintos órganos y niveles de toma de decisiones, y cualesquier otru órganu de composición paritaria o plural. Nes próximes xuntes van formulase propuestes concretes d'acciones y midíes d'igualdá a poner en marcha.