Les II Xornaes Doctorales de la Universidá d'Uviéu axunten dende güei nel Campus de Mieres a 155 mozos investigadores de la Universidá d'Uviéu, que tán realizando la so tesis na institución académica asturiana. Un total de 97 doctorandos participantes ellaboraron, amás, un póster que sintetiza les meyores de los sos trabayos d'investigación, que tomen toles cañes de la conocencia.

L'alcuentru va ser clausuráu mañana vienres pol Rector de la Universidá d'Uviéu, Vicente Gotor. La vicerrectora d'Internacionalización y Posgráu, Covadonga Betegón, y la directora del Centru Internacional de Posgráu, Carmen Bermejo, fueron les encargaes d'abrir oficialmente les xornaes esta mañana.

La segunda edición de les Xornaes Doctorales centra los sos conteníos nes técniques y plataformes más útiles pa llograr una bona comunicación de la investigación y tamién los caminos pa llograr recursos de financiamientu que sofiten el llabor investigador. Amás, va desenvolvese un panel específicu pa encetar les opciones d'insertamientu llaboral y movilidá de los doctorandos.

El programa del alcuentru, entamáu pel Centru Internacional de Posgráu col auspicio del Campus d'Excelencia Internacional, combina ponencies, paneles y sesiones participatives, a lo llargo de dos díes de trabayu. Les Xornaes van incluyir tamién la esposición y, anguaño como novedá, la presentación oral, per parte de los doctorandos, de los pósteres nos qu'afiguren el so proyectu de tesis doctoral y meyores na investigación.

Tesis en toles cañes de la conocencia

Ente los 97 pósteres qu'amuesen les llínees básiques d'investigación de les tesis hai trabayos nos cinco cañes de conocencia. Los doctorandos de la Universidá d'Uviéu céntrense, por casu, n'aspeutos relativos a la xeografía, l'arquitectura o la cultura de la mesma rexón.

Dientro del campu de les ciencies y la biomedicina son numberoses les investigaciones sobre'l cáncer o nel campu de bioloxía funcional y celular. La psicoloxía apurre un nutríu númberu de tesis qu'afonden nel tratamientu de distintes adicciones o'l diagnósticu de ciertos trestornos.

La caña de ciencies sociales y xurídiques apurre trabayos fundamentalmente centraos na economía y l'educación. Nel campu de la inxeniería los doctorandos ocupase de campos como la tecnoloxía de materiales, los procesos de diseñu y construcción, la inxeniería ambiental, los modelos y aplicaciones informátiques o los proyectos d'inxeniería venceyaos a la enerxía o'l medioambiente.