Una xornada dedicada a la figura del científicu Alan Turing, que va rexuntar a más de 200 estudiantes d'ESO y Bachilleratu de la rexón, el próximu 28 de febreru.
La Escuela Politécnica d'Inxeniería de Xixón, al pie de la Fundación Universidá d'Uviéu, entamen el próximu martes, 28 de febreru, ente les 9:45 y les 13:50 h, el Día de la Divulgación Tecnolóxica. Tratase d'una xornada na que van participar más de 200 estudiantes d'ESO y Bachilleratu de distintos centros educativos asturianos. Nesta ocasión conmemorará'l centenariu de la nacencia del investigador inglés Alan Turing, consideráu como unu de los padres de la Informática.
Nel actu d'inauguración, que va tener llugar na Aula Magna del Edificiu Polivalente del Campus de Xixón, van tar presentes el director de la Escuela Politécnica d'Inxeniería de Xixón, Hilario López; el vicerrector d'Informática y Comunicaciones de la Universidá d'Uviéu, Víctor Guillermo García; el decanu del Colexu Oficial d'Inxenieros d'Informática del Principáu d'Asturies, Ángel Retamar; el decanu del Colexu Oficial d'Inxenieros Técnicos n'Informática del Principáu d'Asturies, Óscar Luis Castro; y la directora Xeneral de Cluster TIC Asturies, Alicia Veira.
A lo llargo de la sesión presentaráse la ufierta educativa de la EPI de Xixón. Tamién se va desenvolver la conferencia "IBM: 100 años d'Innovación", al cargu de Mickael Jauneau (IBM). Tres la entrega de premios del concursu de fotografía "II Selmana EPI" y el sortéu de premios de los colexos d'Inxenieros n'Informática ya Inxenieros Técnicos n'Informática del Principáu d'Asturies, los estudiantes van participar n'actividaes empuestes en diversos llaboratorios de la Escuela.
