Un recursu online que va facilitar la tramitación de pidimientos y procedimientos alministrativos.
Cola publicación nel BOPA del Reglamentu sobre accesu a los servicios electrónicos na Universidá d'Uviéu, empieza la so andadura la Sede Electrónica de la institución. Tratase d'un portal web que va faer posible la comunicación ente los ciudadanos y l'Universidá como Alministración Pública. Una ferramienta pa realizar, al traviés d'internet, los distintos trámites que se vaigan incorporando al serviciu.
Na actualidá yá esisten dellos recursos d'esti tipu que la comunidá universitaria vien usando con avezamientu (tramitación de matrícules, solicitú de beques, etc.). La Sede Electrónica de la Universidá d'Uviéu va acoyer estos servicios y va dir incorporando los nuevos procedimientos alministrativos que se vaigan afaciendo a la tramitación electrónica.
Sobre esti soporte tecnolóxicu desenvueltu y xestionáu por C1NN, conforme a les directrices del Vicerrectorau d'Informática y Comunicaciones, van operar los distintos servicios, que'l so conteníu y tramitación correspuende a les mesmes unidaes alministratives que s'encarguen pelo normal d'ellos, so la supervisión y coordinación de la Secretaría Xeneral de la Universidá d'Uviéu.
La Sede va recoyer los servicios que la Universidá yá ufierta al traviés de canales telemáticos, los recursos online destinaos a garantizar la identificación y seguridá de les sos comunicaciones, y los módulos pa oldear la validez de documentos tramitables electrónicamente (certificaos, sellos y firmes dixitales), según una función pal siguimientu de los procedimientos empecipiaos per medios electrónicos. A efectos de plazos de tramitación, dende'l mesmu portal tamién podrán consultase la fecha y hora oficiales, según el calendariu de díes inhábiles. Tamién va recoyer los enllaces d'interés con instituciones y disposiciones llegales sobre l'Alministración electrónica, y una sección d'ayuda, con indicaciones sobre conceutos y operaciones habituales na tramitación per medios electrónicos.
