La Universidá d'Uviéu incorporó güei al empresariu asturianu José Francisco Cosmen Adelaida al so claustru de doctores Honoris causa, nun solemne actu de investidura celebráu na Biblioteca Universitaria. Centenares de persones: representantes de tolos estamentos de la sociedá asturiana, amigos y familiares quixeron acompañar al presidente d'honor de la empresa ALSA nun momentu tan señaláu.

El rector, Vicente Gotor, presidió la ceremonia, que cuntó tamién cola presencia de los exrectores de la Universidá y na que'l catedráticu de Economía Joaquín Lorences actuó como padrín del empresariu, glosando de volao la so figura y el so llabor como artífiz de la espansión internacional de ALSA.

José Cosmen amosóse emocionáu y estimosu pol altu reconocencia que-y espachó la Universidá na qu'estudió. Nel so discursu, Cosmen tuvo una especial alcordanza pa la so etapa universitaria na antigua Escuela de Peritos de Xixón porque-y apurrió una forma de ver, faer y sentir que solo la Universidá ye capaz d'apurrir".

El nuevu Doctor Honoris Causa centró bona parte de la so intervención na necesidá de dar una meyor y mayor cobertoria a los entamadores. "Tenemos qu'ayudar a los qu'opten por esta nada fácil, pero ilusionante y venturera vía empresarial", esplicó. Finalmente, el presidente d'honor de ALSA abogó por una salida a la crisis basada nel trabayu conxuntu: "Si toos collaboramos xuníos trabayando con prudencia na mesma dirección toi seguro de que podemos atopar el camín pa superar les dificultaes que güei soportamos, sofitando ya impulsando la creación y el desenvolvimientu de proyectos empresariales, como la meyor fonte de creación de riqueza y empléu."

El rector, Vicente Gotor, destacó nes sos palabres "la fonda asturianía y el deséu de contribuyir al desenvolvimientu de la so rexón" que caractericen a José Cosmen, siempres sol auspicio d'unos valores que comparte dafechu cola comunidá universitaria "como l'espíritu entamador, la innovación, la molición por crecer y progresar, la visión internacional de la empresa y l'interés por abrir nuevos caminos."

Eses señes d'identidá de José Cosmen son les mesmes qu'inspiren l'esfuerzu de la Universidá d'Uviéu "por fomentar l'espíritu entamador y la visión internacional, impulsando la movilidá de los nuesos estudiantes y profesores pa convertinos en polu de captación de talentu". Asina, Vicente Gotor dio la bienvenida al empresariu al claustru universitariu, col enfotu de que la so presencia na institución académica "sirva como estímulu y reconocencia a les persones qu'entamen, arriesguen y trabayen pola prosperidá de la rexón y de la sociedá."