El Rector de la Universidá d'Uviéu, Vicente Gotor, y el so homólogu de la Universidá Politécnica de Silesia (Polonia), Andrzej Karbownik, roblaron esta mañana dos talos convenios de collaboración ente dambes instituciones col fin de promover la cooperación nos campos de la enseñanza, la investigación científica y la cultura, y poner en marcha una doble titulación de máster universitariu.

L'alcuerdu marco va impulsar les acciones pal intercambiu de personal y estudiantes, favoreciendo asina les estancies d'investigadores y docentes en Polonia pa estrechar la collaboración en temes d'interés común.

Pela so parte, el conveniu específicu inclúi la implantación, a partir del próximu cursu 2012-13, de la doble titulación del máster universitariu en Prevención de Riesgos Llaborales. La semeyanza ente los programes impartíos en dambes universidaes facilitó diseñar una doble titulación que va dexar a quienes cursen esti máster llograr el títulu de dambes instituciones.

El Máster en Prevención de Riesgos Llaborales cuenta con una carga docente de 90 creitos ECTS y una duración de tres semestres en dambes universidaes. El programa pretende ufiertar una formación especializada de profesionales multilingües na área de la prevención de riesgos llaborales, aumentando l'interés de la ufierta formativa nel ámbitu européu, la posibilidá d'elección polos alumnos de cursos y los correspondientes profesores y especialistes de les instituciones que roblen el presente conveniu.

El rector de la Universidá d'Uviéu destacó la importancia d'esti títulu doble y la gran calidá de la enseñanza que nesta área ufierta la universidá polaca. Amás, indicó que'l conveniu marco abre la puerta a ampliar la collaboración en materia d'investigación, daqué de lo que tamién foi sofitáu pol rector de la Politécnica de Silesia.

Na firma del conveniu tuvieron presentes tamién la vicerrectora de Internacionalización y Posgráu, Covadonga Betegón, el decanu del Colexu Oficial d'Inxenieros de Mines del Noroeste d'España, José Fernández Díaz, la profesora coordinadora del Máster de Técnica y Organización de Seguridá ya Hixene nel Trabayu de la Universidá Politécnica de Silesia, Alicja Krzemien, y el profesor coordinador del Máster en Prevención de Riesgos Llaborales de la Universidá d'Uviéu, Pedro Riesgo Fernández.

Los alcuerdos de collaboración con universidaes estranxeres son una de les pieces estratéxiques pa llograr una mayor internacionalización de la Universidá d'Uviéu. Na actualidá, la Universidá d'Uviéu tien roblaos más de 400 convenios de collaboración con instituciones académiques d'Europa, América y Asia.