Balance positivu y reconocencia unánime de la Comisión de Siguimientu del Campus d'excelencia Internacional al trabayu desenvueltu pol equipu rectoral. Estes fueron les impresiones compartíes pol rector de la Universidá d'Uviéu, Vicente Gotor, y el presidente del Principáu, Vicente Álvarez Areces na rueda de prensa posterior a la xunta.

El rector calificó de "satisfactoriu" la resultancia del alcuentru, nel que l'equipu rectoral presentó "de manera clara y meridiana" tantu les acciones del CEI desenvueltes en 2010 como la execución del presupuestu.

Pela so parte, Álvarez Areces destacó'l méritu de la universidá asturiana, qu'a pesar de les dificultaes económiques "caltien los retos de futuru" y que "consiguió articular trés campus escelentes, daqué que bien poques universidaes españoles consiguieron". Nesi sentíu añedió que "en situaciones de crisis la Universidá ye la see na que tienen de depositase los esfuerzos p'abrir camín"; un sofitu que, según Areces, tien de provenir d'instituciones, empreses y de la sociedá asturiana.

A la xunta d'esta mañana allegaron prácticamente tolos miembros de la Comisión de Siguimientu, un órganu responsable de potenciar la relación del CEI col territoriu y la sociedá y copresidido pol rector de la Universidá d'Uviéu y el presidente del Principáu ya integráu por Conceyos, Cámares de Comerciu, FADE, Cajastur, Sindicato CCOO y UXT, según representantes de la institución académica y la Fundación Universidá d'Uviéu (FUO).