Les III Xornaes Doctorales de la Universidá d'Uviéu volvieron ser una cita de referencia pa los mozos investigadores de la institución académica asturiana. Un total de 169 doctorandos participaron nos alcuentros, entamaos dende'l Centru Internacional de Posgráu y col sofitu del Campus d'Excelencia Internacional. Les sesiones dexaron el contactu ente los futuros doctores y el mundu empresarial nes sos distintes aguaes. 

Les distintes posibilidaes d'insertamientu llaboral son una de les principales moliciones de los mozos. Amás, los doctorandos apurrieron la so visión y les sos suxerencies pa tratar d'ameyorar no posible los distintos programes de doctoráu qu'ufierta la Universidá d'Uviéu.

El Rector de la Universidá d'Uviéu, Vicente Gotor, foi l'encargáu de clausurar les xornaes na Aula Magna y animó a los investigadores más nuevos a siguir el so trabayu "y ser interdisciplinares pa conocer lo que se ta faciendo n'otros campos". Acompañáu pola directora xeneral d'Universidaes ya Investigación, Miriam Cueto, y la vicerrectora de Internacionalización y Posgráu, Cuadonga Betegón, fixeron entrega de los premios a los meyores pósteres espuestos na III Xornaes Doctorales. 

Alfonso Gallu y Aránzazu González llograron los premios del concursu de pósteres polos sos trabayos nel campu de la química teórica y la bioquímica, respectivamente

Un total de 87 estudiantes espunxeron en paneles el conteníu principal de les sos investigaciones. Los premios votaos pol xuráu y por los mesmos doctorandos recayeron n'Alfonso Gallu (Premiu del Xuráu) y Aránzazu González (Premiu del Públicu). El póster de Gallu, tituláu Nueves midíes del enllaz químicu, espón un trabayu nel campu de la química teórica sobre'l papel y el funcionamientu de los enllaces químicos. El trabayu de Aránzazu Gallu, doctoranda de la área de bioquímica, enceta l'Activación de rutes de biosíntesis silencioses en Streptomyces albus pa conocer los derivaos qu'esta bacteria puede producir y que pudieren tener nun futuru aplicaciones clíniques.

Los pósteres espuestos recueyen los trabayos de los investigadores más nuevos  en toles cañes de la conocencia. Cabo reseñar el númberu destacaos de proyectos que tán venceyaos de dalguna manera a les árees d'especialización de los clústeres del Campus d'Excelencia Internacional: Biomedicina y Salú, y Enerxía, Medioambiente y Cambéu Climáticu.

Casi una ventena d'investigaciones aconceyaes nes xornaes pertenecen al ámbitu de les ciencies de la salú y dientro d'elles la oncoloxía ye'l campu predominante, calteniendo un estrechu venceyu col Institutu Universitariu d'Oncoloxía del Principáu d'Asturies (IUOPA). La salú mental o les enfermedaes dexeneratives del sistema nerviosu central tamién figuren ente les temes d'atención de dellos doctorandos.

La caña d'arquitectura ya inxeniería recueye trabayos sobre campos bien distintos, dende'l desenvolvimientu de nuevos software informáticos hasta'l tratamientu y diseñu de materiales. La sostenibilidá medioambiental tien un pesu específicu nes investigaciones que se tán llevando a cabu nesta caña, con un protagonismu importante de les enerxíes anovables, nueves técniques de xestión de borrafes o'l perfeccionamiento de procesos de mayor eficiencia enerxética.

Dende l'antiguu Exiptu a les casones d'indianos del oriente d'Asturies, pasando pola estructura platónica na ciudá, la investigación que los doctorandos de la Universidá desenvuelven nel campu d'Artes y Humanidaes representa tou un crisol d'opciones. Mediu centenar d'investigadores d'esta caña diéronse cita nes xornaes doctorales pa presentar los sos trabayos.

La educación y la psicoloxía centren bona parte de los proyectos presentaos nel ámbitu de les ciencies social y xurídicu. La formación del profesoráu enfocada dende distintes perspectives o los mecanismos que rixen los sistemes d'aprendizaxe, de memoria y tamién d'olvidu son oxetu de les tesis doctorales. La economía y el derechu tamién apurrieron enfoques variaos nes investigaciones a cuenta de tributos, lexislación llaboral o empreses familiares.

Finalmente, dientro del campu de les ciencies, cabo reseñar la importancia de la nanotecnología o del desenvolvimientu de nuevos métodos d'analises nes nueves investigaciones. La xeoloxía, les matemátiques, la física y la química concentren bona parte de la investigación básica que se desenvuelve dientro de la institución académica asturiana y que ye'l primer pasu p'algamar una aguada aplicada.