La Universidá d'Uviéu presentó güei la so Guía d'Espertos y Espertes pa Medios de Comunicación, una iniciativa on-line del Campus d'Excelencia Internacional que pretende ser una ferramienta de trabayu rigorosa y eficaz pa los profesionales de la información y pa la sociedá. Cerca de 500 profesores sumáronse a esta guía manifestando asina la so disposición a participar na divulgación científica y nel espardimientu del so trabayu al traviés de noticies, reportaxes, entevistes, artículos d'opinión, etc. nos medios de comunicación.

El rector, Vicente Gotor, y la vicerrectora de Campus d'Excelencia Internacional, Mª Paz Suárez Rendueles, celebraron un alcuentru con responsables de medios de comunicación pa presentar la Guía y esplicar cuálos son los oxetivos y el funcionamientu de la mesma. El rector calificó la creación d'esta guía supunxo un ésitu total", yá que inclúi al 25 % de la plantiya docente ya investigadora de la Universidá d'Uviéu y cuenta con representantes de los 38 departamentos de la nuesa universidá, cubriendo asina toles árees de conocencia y tolos campus universitarios. La base de datos dispon anguaño de más de 1200 términos rellacionaos col ámbitu d'especialización de cada miembru.

La vicerrectora del Campus d'Excelencia Internacional indicó qu'esta guía ta dientro de les pilastres del proyectu Ad Futurum: "La implicación col territoriu", porque esta ferramienta va dexar a la institución tar más en contactu cola sociedá y dar a conocer a espertos silenciosos" de la Universidá d'Uviéu. Nesta llínea, Vicente Gotor aludió a la utilidá d'esta guía tamién pa los que busquen contactar con espertos pa collaboraciones puntuales.

La Guía ta disponible na web del CEI http://cei.uniovi.es y tamién na web de la Universidá d'Uviéu http://www.uniovi.es. Llueu, ente otres actuaciones, va facese la so traducción al inglés coles mires de favorecer la visibilidá internacional de los investigadores de la institución académica.