Pal periodu académicu qu'empieza, La Casa de les Llingües de la Universidá d'Uviéu tien previstu ufiertar 94 cursos en doce llingües distintes: alemán, árabe, asturianu, chinu, francés, inglés, italianu, xaponés, llingua de signos española, polacu, portugués y rusu. El plazu pa matriculase ta abiertu hasta'l 10 de setiembre.

Los cursos van impartirse en siete sedes de los campus d'Uviéu, Xixón, Mieres y Avilés. La see de Xixón-Centro va tar allugada nel Colexu Públicu Los Campos (C/Enrique Martínez, 24).

L'actividá va desenvolverse nel periodu entendíu ente'l 1 d'ochobre de 2012 y el 31 de mayu de 2013, con un máximu de 20 alumnos per grupu. Al rematar el cursu, los participantes qu'asistieren a un mínimu del 85% de les hores lectives y superen l'exame final, van llograr un Certificáu d'Aprovechamientu. Los demás estudiantes van recibir, previa solicitú, un Certificáu d'Asistencia.

Na páxina web de La Casa de les Llingües atopen tolos detalles sobre esta amplia ufierta formativa n'idiomes, según los requisitos d'accesu a los cursos.