El C1N^N hai rediseñado dafechu'l so portal web. Un sitiu d'internet qu'agora inclúi detallada información sobre los servicios qu'empresta'l Centru, según l'accesu al Campus Virtual. L'alumnáu de Cursos d'Adaptación al Grau 2010-2011 tien un apartáu d'accesu esclusivu al Campus Virtual, cuidao que la periodicidad de les sos asignatures nun coincide coles del restu del Campus.

La nueva web recueye tolos datos relativos al C1N^N, una entidá qu'investiga y desenvuelve les tecnoloxíes de la información y la comunicación pa convertiles en ferramientes de xestión, formación y tresmisión de conocencia. Ente otros desenvolvimientos, el Centru encargóse de múltiples portales d'internet venceyaos a la Universidá d'Uviéu, dende la so propia páxina institucional, la del Campus d'Excelencia Internacional o la biblioteca universitaria hasta les de facultaes, escueles y departamentos. Tamién construyó les webs d'entidaes, seminarios, xornaes y actos rellacionaos cola Universidá, según otros proyectos d'algame nacional ya internacional, como Encycloasturias o'l Campus Virtual compartíu G-9.

Dende'l C1N^N contribuyóse coles mesmes a otros proyectos, como'l portal d'ámbitu européu Europeana o'l programa de movilidá virtual TeaCamp. Internet nun ye l'únicu mediu nel que se desendolca la so actividá: al traviés de la Mediateca y del so departamentu de Diseñu Gráficu, C1N^N ye capaz tamién de realizar conteníos de vídeu o elementos de promoción (folletos, cartelería, papelería corporativa) para distintes campañes y servicios.

Otres iniciatives destacaes que tamién lleven el sellu del C1N^N son los distintos servicios de e-Alministración de la Universidá, la tarxeta intelixente o'l portal OCW-Open Course Ware.

Mención especial merez l'actividá del Centru en materia de teleformación. El Campus Virtual, creáu en 1999, creció hasta ufiertar na actualidá 3.100 asignatures, con una media de 80.000 accesos selmanales de 24.000 estudiantes y 2.000 profesores.

Toa esta actividá apaez detallada nel nuevu portal, que refuerza la so vocación de serviciu con una eficaz funcionalidad d'atención al usuariu.