La Fundación Valdés-Salas convoca el II Premiu en Biomedicina Aplicada Valdés-Salas, que tien como oxetivu premiar una investigación biomédica utilizada con ésitu por una empresa, bien na meyora de la eficiencia de procesos de producción yá esistentes o bien nel desenvolvimientu de nuevos productos.

Na so primer edición, el premiu dirixose a los países de fala hispana, ente qu'anguaño ábrese a investigadores que realicen la so actividá n'universidaes o centros d'investigación públicos con see en países pertenecientes a la Organización d'Estaos Iberoamericanos pa la Educación, la Ciencia y la Cultura (OEI). Coles mesmes, l'investigador tien d'allegar en collaboración con una empresa nacional o internacional de cualquier nacionalidá.

El premiu, que'l so xuráu va tar presidíu pol catedráticu de Bioquímica y Bioloxía Molecular de la Universidá d'Uviéu Carlos López-Otín, consiste en 10.000 euros en metálicu. Les solicitúes de participación y los documentos riquíos han d'unviase en formatu dixital a la Fundación Valdés-Salas, antes de les 14 hores del próximu 31 d'ochobre. La fecha llende pal fallu del premiu va ser el 17 d'avientu.

El pasáu añu recibió esti galardón Joan Gil, catedráticu ya investigador de la Universidá Autónoma de Barcelona, pol descubrimientu de la molécula qu'acaba de forma selectiva coles célules tumorales de la leucemia de tipu B, y l'empresa farmacéutica ADVANCELL, cola que'l profesor Gil desenvolvió dicha molécula como fármacu.

La Fundación Valdés-Salas ye una entidá privada que tien ente los sos fines collaborar cola Universidá d'Uviéu pa desenvolver ya intensificar les sos relaciones coles empreses. Nesta llínea, la Fundación promueve el Premiu en Biomedicina Aplicada col copatrocinio de les empreses BAYER y COFAS, Cooperativa Farmacéutica Asturiana.