Llograr un diagnósticu rápido y certero resulta vital nos casos en qu'un neñu ingresa nun hospital con una enfermedá grave. Investigadores de la Universidá d'Uviéu, l'Hospital Universitariu Central d'Asturies (HUCA) y l'Institutu d'Investigación Sanitaria Gregorio Marañón de Madrid avanzaron nel procesu de validación na práctica clínica de ciertos biomarcadores que sollerten d'un mayor riesgu de mortalidá nos neños ingresaos en cuidos intensivos. Les pruebes realizaes a más de 250 pacientes pediátricos ingresaos n'estáu críticu dexaron demostrar que los niveles de cada unu d'estos cuatro marcadores dexen establecer meyor el pronósticu y riesgu de mortalidá d'estos pequeños pacientes.

La prestixosa revista Critical Care acaba de publicar les conclusiones del estudiu desenvueltu a lo llargo d'añu y mediu nes UCI pediátriques de dambos centros hospitalarios y coordinao pol profesor del Departamentu de Medicina de la Universidá d'Uviéu, Corsino Rey. El trabayu desenvolvióse col sofitu de la Fundación Ernesto Sánchez Villares y l'empresa Thermofisher-Brahms.

La posibilidá de detectar nes primeres hores d'ingresu por aciu biomarcadores a los pacientes con mayor riesgu de muerte puede resultar de gran utilidá pa realizar una vixilancia refecha y un tratamientu más intensivu que favoreza la recuperación de los mesmos. La investigación constató que la presencia de niveles elevaos de ciertos indicadores en neños n'estáu críticu sollerta sobre un mayor riesgu de mortalidá. Los facultativos centraron los sos analises en cuatro biomarcadores: procalcitonina, pro-adrenomedulina, pro-endotelina y proteína C reactiva.

Un analís de sangre realizáu nes primeres hores tres l'ingresu en cuidos intensivos pediátricos ayuda a agorar la gravedá d'estos neños.

Fai más d'una década que l'equipu de Corsino Rey trabaya nel analís de la procalcitonina como marcador pa sollertar de la esistencia d'una infección o una inflamación xeneralizada nel organismu. Los investigadores de la Universidá d'Uviéu fueron pioneros nel usu d'esta molécula como biomarcador pa detectar con mayor facilidá los problemes rellacionaos con inflamación o infección.

Nel casu de la pro-adrenodulina y pro-endotelina, dambes dan la voz d'alarma sobre la esistencia de dalgún problema na cubierta interna de los vasos sanguíneos. Pela so parte, la proteína C reactiva utilízase como marcador d'infecciones dende va años nes UCI pediátriques.

El siguiente pasu na investigación va ser analizar cómo repercute la evolución de los niveles d'estos marcadores nel procesu d'ameyoramientu o empeoramientu del paciente. Los facultativos establecen una serie de puntos de corte na escala que-yos dexen determinar la gravedá de cada casu, lo que supon un sofitu clave pal manexu del paciente según pa tresmitir una información fayadiza a les families. La esperiencia clínica nes UCI pediátriques de dambos hospitales dexa realizar un siguimientu de la evolución de los pacientes y los niveles de cada indicador. La impresión actual, que tien de ser confirmada en futuros estudios, ye que cuando los niveles del marcador mengüen la evolución va ser favorable, ente que cuando s'alcen el pronósticu empiora.

Firmantes del artículu

Rey C, García-Hernández I, Concha A, Martínez-Camblor P, Botrán M, Medina A, Prieto B, López-Herce J. Pro-adrenomedullin, pro-endothelin-1, procalcitonin, C-reactive protein and mortality risk in critically ill children: a prospective study. Crit Care. 2013 Oct 16;17(5):R240

Forno d'investigación

• Corsino Rey (Universidá d'Uviéu y HUCA)
• Andrés Concha (HUCA)
• Alberto Medina (HUCA)
• Pablo Martínez-Camblor (Universidá d'Uviéu y FICYT)
• Francisco Álvarez (Universidá d'Uviéu y HUCA)
• Belén Prieto (HUCA)
• Yolanda Díaz (Universidá d'Uviéu y HUCA)
• Sergio Menéndez (HUCA)
• Irene García-Hernández (Hospital Juan Canalejo, La Coruña)
• Juan Mayordomo (Hospital San Agustín y HUCA)
• Marta Los Arcos (Hospital Abargane del Nalón y HUCA)
• Ana Vivanco (HUCA)
• Reyes Fernández (HUCA)

Equipo Investigación Sanitaria Gregorio Marañón de Madrid

• Jesús López-Herce
• Marta Botrán