El portal electrónicu REUNIDO pon a disposición del públicu tolos númberos de Archivium, hasta agora esvalixaos y difícilmente accesibles; les revistes Ería, Liño, Cuadiernos de Xeoloxía y Economics and Business Letters; y más de 2.000 artículos de Psicothema.
La Universidá d'Uviéu desenvolvió un ambiciosu programa de digitalización y xestión electrónica de les revistes especializaes de la institución académica. La plataforma REUNIDO pon a disposición del públicu, online, la versión electrónica de les sos principales publicaciones científiques, que pueden consultase y descargase de forma gratuita.
REUNIDO ufierta la colección completa de Archivium, revista creada en 1951 y hasta agora esvalixada y difícilmente accesible; les publicaciones Trabayos de Xeoloxía, Liño, Ería y, llueu, la nueva Economics and Business Letters. Apocayá, acaba d'incorporase la revista Psicothema, publicación de psicoloxía d'ámbitu internacional anque venceyada dende le so creación a la Universidá d'Uviéu. La plataforma electrónica dexa la consulta de más de 2.100 artículos d'investigación de primera llínea en psicoloxía publicaos en Psicothema dende 1989.
L'oxetivu de REUNIDO ye facilitar l'accesu llibre, inmediatu y gratuitu a la investigación especializada que se realiza na Universidá d'Uviéu. El proyectu foi desenvueltu pol Vicerrectorado d'Estensión Universitaria, Cultura y Deportes, al traviés del Serviciu de Publicaciones.
La edición electrónica non solo esanicia los costos d'impresión en papel sinón que facilita un mayor espardimientu de les revistes científiques. Na mayor parte de los númberos, los artículos pueden consultase n'arquivos PDF sobre los que ye posible realizar busques por palabres.
La plataforma escoyida pa la xestión electrónica de les revistes actives de la Universidá d'Uviéu ye Open Journal System (OJS), de códigu abiertu y llibre distribución. OJS foi desenvueltu pol Public Knowledge Project, organismu canadiense integráu poles Universidaes British Columbia, Simon Fraser y Stanford, que busca facilitar el desenvolvimientu de publicaciones n'accesu abiertu. OJS ufierta una solución integral que dexa un manexu eficiente y unificao de too el procesu editorial, dende la unviada d'artículos per parte de los autores, pasando pola so evaluación, hasta la so publicación final, indexación y llectura. El so oxetivu ye amontar la calidá de les publicaciones, faciendo más tresparentes les polítiques de la revista y ameyorando el indexado.
OJS foi traducíu a dellos idiomes y más de 7.000 revistes en tol mundu faen usu d'esti software. N'España, por casu, apliquenlu el CSIC (revistas.csic.es), el repositorio de revistes d'accesu abiertu de Cataluña (RACO -raco.cat-) o'l portal de Revistes d'Accesu Abiertu de la Universidá de Murcia (revistas.um.es).
