Mediu centenar d'investigadores de too el mundu dan cita n'Asturies dende güei domingu, 1 d'avientu, pa encetar les últimes meyores y retos en redol a les llamaes matemátiques fuzzy. La teoría de conxuntos fuzzy o lóxica difusa intenta consiguir que les máquines puedan asonsañar la forma d'aprendizaxe de los humanos.

Les meyores nesti campu d'investigación resulten especialmente pervalibles pa tou lo rellacionao col desenvolvimientu de la intelixencia artificial una y bones los modelos teóricos diseñaos polos matemáticos dexen que les máquines remanen información imprecisa y tomen decisiones de forma similar a como lo fadría'l celebru humanu.

Espertos de too el mundu van tomar parte nel EUROFUSE 2013 Workshop on Uncertainty and Imprecision Modeling in Decision Making El prestixosu alcuentru ta entamáu pol grupu d'investigación UNIMODE de la Universidá d'Uviéu, lideráu pola profesora Susana Montes.

EUROFUSE 2013 va cuntar con dalgunos de los nomes más destacaos de la teoría de conxuntos fuzzy a nivel internacional como'l casu de el profesores Bernard de Baets (Universidá de Gent), Serafín Moral (Universidá de Granada) y Esteban Induráin (Universidá Pública de Navarra). Alredor d'una trentena de trabayos van ser espuestos a lo llargo del alcuentru. Les investigaciones meyor valoraes van formar parte d'un númberu especial de la prestixosa revista especializada Fuzzy Sets and Systems.