Una investigación desenvuelta nel Departamentu de Filoloxía Clásica y Románica dexó la ellaboración d'una base de cites pionera sobre autores de l'Antigüedá greco-llatina, que les sos obres en munchos casos nun llegaron completes hasta los nuesos díes. El trabayu del equipu lideráu pola profesora Lucía Rodríguez-Noriega Guillén dexó, por casu, sacar a la lluz a autores dafechu desconocíos, como Odiseo, un metricólogo qu'ufierta la definición de lo que ye un versu, y que la so esistencia y aportaciones nun s'habíen documentado hasta agora.

Tratase de la primer investigación que busca desaposiar y analizar sistemáticamente toles cites (lliterales o non) d'un ampliu corpus eruditu, poniendo de relieve'l pesu específicu de la tradición lliteraria na Antigüedá tardida. Les referencies a otros autores y les sos obres (cites lliterales o non, paráfrasis, imitaciones, testimonios, etc.) detectaes nos 28 escritores que constitúin l'elencu completu de los gramáticos, retóres y sofistes de los sieglos III ya IV .d.C. conformen esta base de datos n'abiertu. L'analís refechu del material va ayudar a conocer meyor non yá la obra de los autores que los sos escritos tán estudiándose, sinón tamién les aportaciones y l'impactu que tuvieron les contribuciones de otru autores a los qu'ellos lleeron, y que'l so trabayu nun se caltuvo per vía directa hasta l'actualidá.

Una plataforma n'abiertu recueye tola información pa ellaborar una rede de fontes ya influencies nos eruditos griegos de los sieglos III-IV d.C., antes del trunfu del llibru nel so formatu actual.

Les nueves tecnoloxíes dexaron que tou esi material tea gratuitamente a disposición d'espertos de too el mundu nuna web que s'actualiza a midida que algámense nueves resultancies del trabayu. El calter innovador de la iniciativa y el so valor estratéxicu como material de consulta faen que'l portal, abiertu'l pasáu ochobre, tea llamáu a convertise nuna referencia pa especialistes internacionales nesti campu.

La elección de los autores y la dómina nun son casuales. "Los gramáticos, retóres y sofistes son escritores que citen a otros con muncha frecuencia, sobremanera como modelu o exemplu, y por eso nes sos obres hai especial riqueza de testimonios y fragmentos de filósofos, poetes, gramáticos, oradores, historiadores… anteriores", esplica Lucía Rodríguez-Noriega Guillén. Per otru llau, los autores griegos de los sieglos III ya IV d. C. resulten especialmente pervalibles pa rescatar la obra de dalgunos de los sos predecesores más desconocíos, una y bones la popularización, a partir del s. IV d.C., del formatu del llibru tal que lu conocemos anguaño, en sustitución del rollu de papiru, supunxo un puntu críticu por que bona parte de la lliteratura grecolatina perdiérase, al nun ser copiada al nuevu soporte. Ellos, sicasí, inda pudieron aportar a munches obres qu'en pocos sieglos taben llamaes a sumir.

El proyectu d'investigación La tradición lliteraria griega nos ss. III-IV d.C. gramáticos, retóres y sofistes como fontes de la lliteratura greco-llatina, financiáu pol Ministeriu d'Economía y Competitividá, pretende documentar la tresmisión indirecta de les obres d'autores clásicos citaes por otros nel mentáu corpus d'eruditos. Los investigadores de la Universidá d'Uviéu empecipien la so xera desaposiando dafechu les obres de los autores escoyíos. "Estrayemos absolutamente toles referencies a otres obres y autores, independientemente del tipu de cita de que se trate, y de que la so autoría tea o non indicada espresamente. A partir d'ende, ellaboramos una ficha de caúna d'eses cites, que traza la so hestoria dende'l so autor orixinal hasta finales del períodu Bizantín", indica la investigadora principal del proyectu.

Esi llabor d'analís pormenorizáu va construyendo una rede de relaciones ente autores y ampliando la información sobre aquellos que resulten más desconocíos pal gran públicu. El trabayu concienzudo de rastrexu de cada cita pa dar col so orixe y cola so presencia a lo llargo de la hestoria dexa, por casu, constatar que Homero, y en concretu La Iliada, ye l'autor griegu más citáu. "Homero sería'l trending topic del momentu", esplica Lucía Rodríguez-Noriega, estableciendo una comparanza col presente. Nel casu de los filósofos, los dos más citaos son Platón y Aristóteles, por esi orde.

Los investigadores de la Universidá d'Uviéu trabayen en collaboración con filólogos de la Universidá de Zaragoza, que desenvuelven un subproyectu coordináu sobre Los gramáticos llatinos tardíos como fonte pa la conocencia de la tradición gramatical greco-llatina. El proyectu tamién cunta cola collaboración d'investigadores de la Universidá del País Vascu.

Equipu d'investigación

• Lucía Rodríguez-Noriega Guillén
• María José García Soler
• Manuel González Suárez
• Luis Alfonso Llera Fueyo
• Lorena Molina Molina
• Virginia Muñoz Llamosas
• Javier Verdejo Manchado

Imaxe de portada

Parte del manuscritu del Ars Rhetorica de Apsines, que contien una cita de les Troyanes de Eurípides. En colloráu, les indicaciones que señalen el nome del autor citáu y l'indicación de que se trata d'una cita en versu.