La cuarta edición de La Nueche de los Investigadores axuntó esta tarde a cientos de neños, que s'averaron hasta'l Palaciu Conde de Toreno pa participar en dalgún de los talleres programaos. ¿Les solombres son negres realmente? ¿Puede volvese l'agua azul solo con ximelgala? Fueron dalgunes de les entrugues a les qu'atoparon respuesta los más pequenos gracies a esta iniciativa impulsada dende'l Vicerrectorado d'Investigación y Campus d'Excelencia Internacional p'averarse la ciencia a los neños y los mozos.

Dende les 18:00 a les 22:00 hores una decena d'investigadores de la Universidá d'Uviéu desenvolvieron seis talleres qu'averaron al públicu esperimentos senciellos que los ayudar a conocer más de cerca dellos fenómenos de la naturaleza. Biólogos, físicos, xeólogos y químicos fueron los encargaos d'emponer a los más pequenos por dalgunos de los secretos de la naturaleza que los arrodia. A lo llargo de tola tarde los científicos esplicaron conceutos y esperimentos senciellos p'avera-yos a la figura y el trabayu del investigador. Los talleres programaos pa esta edición son: Viaxe al interior del celebru, La enerxía de la lluz, Química y melecines, El color de la Química, Magnetismo… ¡te atrai! y Viaxe al centru de la tierra.

La Nueche de los Investigadores, entamada dende la Unidá de Cultura Científica de la Oficina de Tresferencia de Resultancies de la Investigación, ye una iniciativa de divulgación científica que se celebró simultáneamente en 29 ciudaes españoles y que cunta col financiamientu del Séptimu Programa Marco de la UE.