La Unión d'Editoriales Universitaries Españoles (XUNI) concedió a la Universidá d'Uviéu los galardones a la obra meyor editada en 2012, pol llibru Transacciones. España na hestoria de la Royal Society, y a la meyor coedición con una editorial privada, por Ad Orientem (Universidá d'Uviéu y Ménsula Ediciones), distinciones que formen parte de los XVI Premios Nacionales d'Edición Universitaria, a los qu'allegaron 140 obres.

La obra Transacciones, de la que'l xuráu premió "la calidá y orixinalidá de la edición y el calter novedosu de los materiales, según el so diseñu", publicóse arriendes de la amuesa celebrada na Biblioteca Universitaria en 2011 con motivu del Premio Príncipe d'Asturies de Comunicación y Humanidaes a la Royal Society. El llibru recueye fotografíes de pieces que s'espunxeron per primer vegada nel nuesu país pa rindir tributu a la participación de los científicos españoles na hestoria. Los testos de Transacciones tuvieron a cargu del profesor de la Universidá d'Uviéu Armando Menéndez del Viso, ente que'l diseñu tuvo al cargu de Manuel Fernández.

Pela so parte, Ad Orientem. Del final del Paleolíticu nel norte d'España a les primeres civilizaciones n'Oriente Próximu, del que'l xuráu valoró "la calidá de la edición y la presentación de la obra", axunta los estudios n'homenaxe al profesor d'esta institución académico y arqueólogo Juan Antonio Fernández-Tresguerres, fináu en 2011.

El xuráu tuvo compuestu poles siguiente personalidaes: Nuria Azancot, xefa de redacción de El Cultural d'El Mundu; Laura Revuelta, redactora xefa del ABC Cultural; Teresa M. Peces, directora de la revista Delibros; Ernesto Pérez Zúñiga, director del Departamentu d'Actividaes Culturales del Institutu Cervantes; y Alejandro Cremades, subdireutor xeneral de Formación y Movilidá del Profesoráu ya Innovación Docente nel Ministeriu d'Educación, Cultura y Deportes.

Per primer vegada desque se convoquen los Premios Nacionales d'Edición Universitaria, cualesquier ciudadanu que lu deseye va tener la oportunidá de ver y consultar los llibros premiaos y el restu de los qu'optaron a la decimosesta edición d'estos galardones, una y bones les obres qu'allegaron tán espuestes na Llibrería Científica CSIC-XUNE de Madrid hasta'l próximu 7 d'ochobre.