El Gobiernu d'Asturies y l'Universidá d'Uviéu algamaron un alcuerdu para garantizar la estabilidá presupuestaria de la institución académica hasta 2028. El conveniu de collaboración que se va roblar nes próximes selmanes establez un modelu de financiamientu pol que la universidá va recibir más de 1.000 millones d'euros en seis años, a los que se van sumar les partíes correspondientes a otros conceutos venceyaos a programes d'investigación o ayudes para estudiantes.

 

El conseyeru de Ciencia, Innovación y Universidá, Borja Sánchez, y el rector de la Universidá d'Uviéu, Ignacio Villaverde, presentaron esta mañana les llínees básiques del alcuerdu, qu'agora tendrá de llograr el vistu bonu del Conseyu de Gobiernu de la institución académica, Conseyu Social y finalmente del Conseyu de Gobiernu del Principáu. Nel actu tamién tuvieron presentes la directora xeneral d'Universidá, Cristina González, y el xerente de la Universidá, José Antonio Díaz Llagu.

 

Tantu Principáu como universidá consideren qu'esti alcuerdu marca un finxu históricu, yá que fixa una estabilidá per seis años, prorrogable otros cuatro. En total, un horizonte de diez años por que la institución académica pueda planiar la so estratexa de futuru.

 

El conveniu regula l'aportación ordinaria a la Universidá d'Uviéu, el financiamientu por resultancies y el plan d'inversiones, y supon una medría considerable sobro'l contratu programa vixente anguaño.

 

En grandes cifres, l'alcuerdu parte d'un aumentu pa 2023 de casi 12 millones d'euros que se van incluyir nel presupuestu, lo que supon un 8% de medría. En númberos redondos, el conveniu del presente exerciciu destina 150 millones d'euros incluyida la compensación pola conxelación de les matrícules- al financiamientu básicu de la Universidá d'Uviéu. Esta partida va alzar a casi 162 millones d'euros pal próximu añu. 

 

En total, el Principáu va apurrir a la Universidá 1.047.854.511 euros nestos próximos seis años pa financiamientu ordinariu, onde s'inclúin gastos de personal, costu de titulaciones, compensación por tases, ente otros puntos; el plan d'inversiones; y el financiamientu amestáu al cumplimientu d'oxetivos. 

 

Ello ye que el financiamientu por resultancies va recibir xuna inyección de daqué más de 600.000 euros, pasando de los 2,5 millones d'euros en 2022 a los 3,1 en 2023, cantidá venceyada al cumplimientu de 25 indicadores de meyora, fundamentalmente en docencia, investigación, internacionalización, tresferencia de conocencia ya igualdá.

 

Esti alcuerdu constitúi la mayor medría de financiamientu pa la Universidá d'Uviéu. A les cifres recoyíes nel conveniu hai qu'añedir les aportaciones que la institución académica recibe del Gobiernu d'Asturies por otros conceutos, como les ayudes del Programa Severu Ochoa, beques pal estudiu, o convocatories amestaes a la retención y atracción de talentu o pa grupos d'investigación.

 

El conseyeru de Ciencia calificó l'alcuerdu de "un finxu nel financiamientu universitariu asturiana y un exemplu pal sistema universitariu español". Borja Sánchez fixo fincapié non solo nel aumentu financieru que s'afita sinón na duración: "La Universidá tien un horizonte de diez años d'estabilidá financiera pa desenvolver los sos planes estratéxicos, al marxe de llexislatures polítiques y mandatos rectorales".

 

Pela so parte, el rector, Ignacio Villaverde, destacó la importancia de cuntar con un contratu programa qu'ufierta a la institución xuna estabilidá presupuestaria como nunca antes tuvo" y valoró bien positivamente la medría pa 2023 d'un 8%. "El conveniu pasa de los 150 millones nel añu 2022 a casi 162 en 2023", señaló, y añedió que "la crecedera consolídase añu tres d'añu hasta llegar a una proyección de 187,7 millones en 2028".