MBA SURGICAL EMPOWERMENT y l'Universidá d'Uviéu ponen en marcha la Cátedra de MBA Institute d'Investigación Médica y Biomecánica
La cátedra naz coles mires d'afondar nel estudiu de distintos campos rellacionaos coles árees de la medicina nes que desenvuelve la so actividá la empresa como la traumatoloxía, ortopedia, anestesiología, neurociruxía o ciruxía xeneral | Va Llevar a cabu diverses actividaes formatives, d'investigación y divulgación, va convocar premios para trabayos de fin d'estudiu y va ufiertar ayudes para la realización de tesis doctorales
MBA SURGICAL EMPOWERMENT y l'Universidá d'Uviéu roblaron esta mañana un conveniu al traviés del cual crean una cátedra d'investigación médica y biomecánica. La cátedra va tener por oxetivu ameyorar el desenvolvimientu de les llínees d'investigación actuales, como l'estudiu de la remodelación ósea o los analises tensionales para evaluar el comportamientu biomecánico de les articulaciones y sistemes protésicos por aciu estudios clínicos, mecánicos o analises por aciu elementos finitos. Tamién va sirvir de marcu para la creación de nueves llínees multidisciplinares d'inxeniería biomédica, desenvolvimientu de productos y servicios de bioingeniería y bioinformática. El documentu foi suscritu pol rector de la Universidá d'Uviéu, Ignacio Villaverde, y el director xeneral de MBA, Carlos Marina Barriu.
La cátedra va realizar diverses actividaes formatives, d'investigación y divulgación y va promover ayudes nesti campu. Ente les acciones formatives a desenvolver, destaquen la celebración de seminarios en biomecánica, cursos d'impresión 3D en centros hospitalarios, práctiques extracurriculares d'estudiantes de grau y posgráu n'empresa o convocatories de premios pa trabayos de fin d'estudios nesti ámbitu. Amás, ente les acciones d'investigación, la cátedra va ufiertar servicios de sofitu a la investigación biomédica y ayudes a la realización de tesis doctorales. A lo último, va realizar xornaes de divulgación científica o publicaciones sobro temes d'interés de la cátedra.
Carlos Marina, director xeneral de MBA, dixo que "ye un arguyu pa nós poder formar parte d'esta iniciativa". "El compromisu cola formación y l'investigación científica ta nel ADN de la compañía dende'l so orixe", esplicó, y añedió que "somos conscientes de la responsabilidá de les empreses para cola sociedá, y consideramos qu'esti tipu de collaboraciones son xuna escelente vía pa la tresferencia de conocencia ente universidá y empresa".
Pela so parte, el rector de la Universidá d'Uviéu, Ignacio Villaverde, estimó l'apueste de MBA SURGICAL EMPOWERMENT pola Universidá d'Uviéu, yá que, tal que señaló "ye fundamental qu'empreses piqueres nel so sector, como ye'l casu de MBA, cunten cola institución y col texíu científico ya innovador que podemos apurrir". "Tamos énte un campu n'alza, nel que resulta fundamental el trabayu conxuntu d'universidá y empresa", dixo.
L'actu inaugural de la cátedra, que tuvo llugar na Escuela Politécnica d'Inxeniería de Xixón de la Universidá d'Uviéu, cuntó cola presencia, amás, de Juan Carlos Campo, director de la escuela; José Antonio Vega; decanu de la facultá de Medicina y Ciencies de la Salú y codirector de la cátedra. Amás, Jorge Albareda Albareda, xefe del serviciu COT del Hospital Clínicu Universitariu Lozano Blesa de Zaragoza y presidente de la Sociedá Española de Ciruxía de Cadril (SECCA), ufiertó xuna ponencia inaugural titulada "Investigación biomecánica en ciruxía ortopédica y traumatoloxía".
Galería d'imaxes
