El Claustru de la Universidá d'Uviéu celebró esta mañana la so primer xunta del cursu 2022-2023, nun alcuentru nel que dio lluz verde a les propuestes de la Comisión para la Memoria Histórica, escoyó a los miembros del Comité d'Ética de la institución y presentóse l'informe del rector, Ignacio Villaverde, sobro les acciones realizaes mientres los primeres 18 meses de mandatu. 

 

Nel so informe, el rector repasó per árees les distintes xestiones llevaes a cabu tantu nos primeres seis meses de mandatu, dende marzu a setiembre del añu 2021, como a lo llargo del cursu académicu 2021-2022. Destacó trés urxencies ineludibles nesi primer semestre: "La pandemia, la necesidá d'aprobar el presupuestu de 2021 y l'ausencia del preséu llegal que regulara les relaciones ente la Universidá y la so Fundación". El rector refirióse tamién a los primeros retos pa los 100 primeros díes, marcaos nel so programa electoral. Tocantes a lo xestionao mientres el cursu 2021-2022, el rector mentó, ente otres cuestiones, el trabayu realizáu pa definir al traviés de los planes estratéxicos, "lo que queríamos ser como universidá pública y la nuesa misión na nuesa redolada socioeconómico". 

 

Per árees, destacó, n'investigación, la importancia de los programes de recualificación del ministeriu, la creación del hub de proyectos europeos, o la creación del Institutu Mistu de Biodiversidá; n'estudiantáu, sorrayó la firma de 274 nuevos convenios con empreses pa práctiques del alumnáu. Tocantes a estensión universitaria, mentó'l programa UO Territoriu o les actividaes realizaes nel marcu del añu del Centenariu Alarcos. Tamién destacó la publicación de nueves normes y criterios pa la convocatoria de places de profesoráu o la xestión realizada nel ámbitu de xestión académica nos posgrados, cola revisión de procedimientos alministrativos, nueves funcionalidades dixitales, etcétera.

 

En internacionalización, Villaverde quixo poner en valor los alcuerdos alcanzaos con grandes instituciones, como les roblaes con Harvard, TEC Monterrey, Oxford, Trenton o Utah. Nel ámbitu de les polítiques d'igualdá ya inclusión, el rector refirióse al II Plan d'Igualdá, el protocolu de cambéu de nome, o la guía de llinguaxe inclusivu. La meyora de prestaciones nel SIES y nel Campus Virtual o la implantación de la plataforma Universitas XXI fueron mentaes nel apartáu de tresformamientu dixital. Tocantes a tresferencia y relaciones cola empresa, el rector señaló la importancia de la puesta en marcha de los TalentUO Labs o'l Mapa de Emprendimiento. El plan de sostenibilidá medioambiental y d'eficiencia enerxética o la instauración de programes en movilidá (tresporte compartíu, movilidá eléctrica, movilidá sostenible, etcétera) tamién fueron incluyíos por Villaverde, que quixo recordar tamién la importancia de los dos aniversarios de campus celebraos el cursu pasáu, nel Campus d'El Milán y en Mieres. 

 

Informe de Memoria Histórica

 

En cuanto al informe de la Comisión de Memoria Histórica, inclúi, ente otres acciones, les siguientes propuestes:

 

Al pie de los elementos que se caltienen (escudu, vidreres ya inscripción llatina), va apaecer un testu que señala la presencia de simboloxía de la dictadura y el so caltenimientu n'aplicación del artículu 15.2 de la Llei 52/2007 de 26 d'avientu (Llei de Memoria Histórica) por allegar razones artístiques o arquitectóniques. 

 

Comité d'Ética de la Universidá d'Uviéu

 

A lo último, el Claustru Universitariu escoyó a los miembros del Comité d'Ética de la Universidá d'Uviéu, que va quedar conformáu polos miembros del PDI María Serafina García García, Pascale Véronique Crochet, Rafael González Ayestarán, María José García Salgado y Esteban Agulló Tomás, el representante del estudiantáu Jesús Vera Berdasco y la representante de la PAS María Asunción Güerta Nosti.