Cuatro proyectos venceyaos a la innovación y sostenibilidá nos ámbitos de la digitalización tecnolóxica, movilidá eléctrica, xestión enerxética y l'internet de les coses (IoT) fueron escoyíos para próxima edición del programa Xplore Technology Awards 2023 de la multinacional alemana Phoenix Contact. Estos proyectos fueron presentaos por distintos equipos de calter multidisciplinar de la Universidá d'Uviéu. La institución académica asturiana conviértese d'esta miente na universidá europea col mayor númberu de proyectos que van participar nesta competición internacional.

 

Los cuatro proyectos escoyíos fueron presentaos esta mañana nun actu desenvueltu na Escuela Politécnica d'Inxeniería del Campus de Xixón que cuntó cola participación de Begoña Cueto, vicerrectora de Tresferencia y Relaciones cola Empresa, Juan Carlos Riolo, director de la EPI; y Adriano Mones, embaxador del programa Xplore Innovation Awards 2023 de Phoenix Contact Tech Education.

 

El Grupu n'Inxeniería de Proyectos ya Inxeniería Sostenible, formáu principalmente por profesores ya investigadores de la Área de Proyectos d'Inxeniería, foi escoyíu para desenvolver un proyectu venceyáu a la xeneración d'enerxíes llimpies nel ámbitu de la digitalización. El Wolfast Uniovi Racing Team resultó seleccionadao para diseñar una batería modular na categoría de movilidá eléctrica. L'equipu de la Cátedra Xixón Smart Cities va ellaborar un sistema avanzáu de xestión d'activos enerxéticos nel apartáu de tecnoloxíes dixitales. Y, a lo último, na categoría de factoría intelixente, la Área d'Inxeniería de Sistemes y Automática va crear una máquina automatizada destinada a la ellaboración de texíos y recreación d'obres d'arte. 

 

De manera adicional, dos proyectos más presentaos dende Asturies fueron escoyíos nesta ocasión. Unu d'ellos ye'l denomináu Tech Education Metaverse de la startup PXR, venceyada a la Universidá d'Uviéu, que foi escoyida na categoría d'educación para desenvolver un proyectu que'l so algame consiste en crear un metaverso de formación escalable por aciu l'usu de la realidá virtual. Finalmente, el proyectu y-com, presentáu pol CODEMA de Xixón y que'l so algame ye'l diseñu d'un contenedor intelixente para'l reciclaje de borrafes tamién foi escoyíu na categoría d'educación. 

 

Esta multinacional alemana lleva 20 años entamando esta competición internacional de tecnoloxía y educación tantu para estudiantes de secundaria y de formación profesional, como para universitarios, profesores y entamadores nel ámbitu de la innovación tecnolóxica y la sostenibilidá. Nesta edición, los 20 meyores proyectos de too el mundu van ser convidaos a Alemaña para participar na gran final, que va tener llugar en 2023, coincidiendo col 100 aniversariu de Phoenix Contact.