El Conseyu de Gobiernu de la Universidá d'Uviéu aprobó, na sesión celebrada esta mañana, la Ufierta Pública d'Empléu 2021, según delles places entá pindies d'Ufiertes Públiques d'Empléu previes (de 2019 y 2020) En concretu, aprobóse un total de 65 places, partíes de la siguiente manera: 

 

- 13 places de Catedráticu Universitariu de la OPE 2021

- 14 places de Titular Universitariu (13 d'elles de la OPE 2021 y 1 plaza per discapacidá de la OPE 2019)

- 33 places de Profesor Contratáu Doctor (30 d'elles de la OPE 2021 y 3 places per discapacidá de la OPE 2020 y de la OPE 2021)

- 3 places de Titular Universitariu + I3 (1 plaza de la OPE 2020 y 2 places de la OPE 2021)

- 2 places de Profesor Contratáu Doctor + I3 de la OPE 2020

 

Amás, el máximu órganu de decisión universitariu dio'l vistu bonu a la primer convocatoria de bolses d'empléu temporal de la Universidá d'Uviéu, qu'implica la puesta en marcha de 119 concursos. "Esta convocatoria surde tres l'aprobación, en Conseyu de Gobiernu del 29 d'abril, del procedimientu para la ellaboración de bolses d'empléu temporal de personal docente ya investigador, que s'articulen como un preséu al que puede recurrise para atender les necesidaes docentes urxentes n'árees que les sos circunstancies enzanquen la cobertoria de vacantes", esplicó Pedro Alonso, vicerrector de Polítiques de Profesoráu.

 

Per otru llau, el Conseyu tamién aprobó la propuesta de cambéu del Primer Conveniu del Personal Llaboral de la Universidá d'Uviéu, que'l so conteníu cuenta col vistu bonu del comité d'empresa. Según manifestó'l xerente, José Antonio Díaz Llagu, "esti cambéu ye un pasu más para avanzar nel procesu de estabilización de places de personal temporal nel que s'atopa somorguiáu la institución académica". 

 

Oxetivos semestrales y Campus d'El Cristu

 

Nel Conseyu de Gobiernu d'esta mañana, el rector de la Universidá d'Uviéu, Ignacio Villaverde, esplicó nel so informe los oxetivos estratéxicos d'esti semestre, ente los que destaquen la redacción de los planes operativos per árees de gobiernu, la nueva web institucional, promover la redacción de planes estratéxicos de cada unu de los campus, la puesta en marcha de la factura y el rexistru electrónicu, l'esplegue d'una estratexa d'eficiencia enerxética, el desenvolvimientu del campus européu Ingenium o la planificación del futuru desenvolvimientu del Campus d'El Cristu. Precisamente sobro esta última cuestión, el rector ufiertó a los conseyeros la información de la que se dispon hasta'l momentu sobro'l principiu acordies con el Principáu d'Asturies pal desenvolvimientu del Campus d'El Cristu nos terrenes del antiguu hospital.

 

Sobro'l campus européu Ingenium, el vicerrector de Internacionalización, Daniel Santos, esplicó que los oxetivos a llograr ente 2023 y 2026 pasen por "poner en marcha titulaciones abiertes que dexen xuna configuración curricular flexible, avanzar na xeneralización de la movilidá d'estudiantes, desenvolver programes d'estudios conxuntos, llograr la acreditación calidable de los programes d'estudios conxuntos y establecer una reconocencia automática de los estudios realizaos en cualesquier de les universidaes". Santos añedió que Ingenium va ser un marcu "pa la formación d'equipos de docentes, investigadores, estudiantes, la industria y la sociedá que dea continuidá y relevancia a los programes d'estudiu y pa compartir la nuesa esperiencia con otres instituciones d'enseñanza cimera europees". Señaló tamién que "va ufiertar oportunidaes pa la crecedera de grupos d'investigación emerxentes por aciu el sofitu a proyectos d'investigación conxuntos y facilitando la movilidá d'investigadores; principalmente nos entamos de la so carrera".

 

Emerxencia enerxética 

 

La vicerrectora de Sostenibilidá, Movilidá y Mediu Ambiente, Sandra Velarde, presentó al Conseyu de Gobiernu l'espaciu web de sostenibilidá y dio cuenta de la información disponible sobro la emerxencia enerxética, que ta accesible nesi portal (https://www.unioviedo.es/espaciosostenible/). En concretu, los datos amosaos pola vicerrectora demuestren que les midíes d'aforru adoptaes supunxeron xuna amenorgamientu del consumu en redol al 20% con respectu al mesmu períodu de 2019 (últimu añu normal antes de la pandemia). "Sicasí, la esguilada de precios esperimentada a lo llargo del branu foi dramática, y en xunetu fiximos frente a una factura de 414.000 euros, más del doble qu'en xunetu de 2019 a pesar del amenorgamientu del consumu", esplicó.

 

Suspensión del Plan Marco pa la Xestión de la Pandemia y aprobación del Reglamentu de Relaciones Electróniques

 

El Conseyu de Gobiernu de la Universidá d'Uviéu aprobó tamién la suspensión del Plan Marco pa la Xestión de la Pandemia. El rector esplicó que, "en vista de los encamientos sanitarios y de la suspensión de la mayor parte de les midíes per parte de les autoridaes sanitaries, el Plan Marco nun va ser d'aplicación". A lo último, el máximu órganu dio lluz verde al reglamentu de relaciones electróniques, un documentu que sienta les bases pa la puesta en marcha de l'alministración electrónica.