La Fundación Centro Español de Solidaridá del Principáu d'Asturies recueye'l Premiu Ana Casanueva
La institución foi galardonada por Proyectu Home, un programa educativu-terapéuticu qu'ufierta una atención integral a persones con adicciones
La Capiya del Edificiu Históricu de la Universidá d'Uviéu acoyó esta tarde l'actu d'entrega del Premiu Ana Casanueva 2022 a La Fundación Centro Español de Solidaridá del Principáu d'Asturies (CESPA) pol so Proyectu Home. La entidá galardonada foi reconocida con un premiu únicu de 50.000 euros. Esta decisión foi tomada'l pasáu 23 de setiembre pol xuráu conformáu por Ignacio Villaverde, rector de la Universidá d'Uviéu; Alberto Aza Arias, conseyeru Permanente d'Estáu; Carlos Fernández Collada, presidente de l'Asociación Iberoamericana de la Comunicación; José Luis García Delgado, exrector de la Universidá Menéndez Pelayo; y Rosa María Menéndez, investigadora del CSIC.
El Premiu Ana Casanueva, convocáu pol empresariu y filántropu ástur-mexicanu Carlos Casanueva Vares y l'Asociación Iberoamericana de la Comunicación (ASICOM) en collaboración cola Universidá d'Uviéu, tien como oxetivu reconocer el trabayu d'organizaciones non gubernamentales, instituciones d'asistencia privada, fundaciones, asociaciones civiles y organismos ensin fines d'arriquecimientu que cunten con una trayectoria de siquier 5 años a partir de la constitución llegal de la organización, qu'operen nel Principáu d'Asturies y que los sos proyectos fueren los más destacaos mientres l'añu 2021 en temes d'impactu social na comunidá.
Les exes temátiques para otorgar el premiu son: atención y sofitu a población en condiciones de desventaxa, esclusión social o probeza; xeneración d'oportunidaes y accesu a educación y formación; accesu a servicios sociales y de salú; sofitu a migrantes, y trabayu con grupos vulnerables o en riesgu.
Nesti sentíu, la Fundación Centro Español de Solidaridá del Principáu d'Asturies (CESPA), fundada en 1987, ye xuna entidá privada, ensin ánimu d'arriquecimientu, que la so misión ye l'atención integral a les persones en riesgu d'esclusión social. Dende los sos entamos dirixió la so actuación a les persones con problemes d'adicciones, desenvolviendo para ello'l programa educativu-terapéuticu Proxecto Home n'Asturies. Tou ello dende una filosofía basada nos principios de solidaridá, collaboración, profesionalidá, participación, enfotu na capacidá de cambéu de les persones y tresparencia énte la sociedá.
Galería d'imaxes
