Universidá d'Uviéu y Conceyu d'Uviéu van trabayar xuntos para detectar el talentu universitario y van poner en marcha diversos programes qu'averen a los mozos al mundu de la empresa y promuevan la xeneración d'idees de negociu. Para llevalo a cabu, universidá y conceyu roblaron un conveniu que contempla la puesta en marcha de trés proyectos, "Explorer", "Sí Somos Innovación" y "Science2Business", que tienen por oxetivu la busca del talentu universitario y el so potenciación.

 

El conveniu, que foi robláu pol conceyal d'Economía y Tresformamientu Dixital del consistoriu uvieín, Javier Cuesta, y la Vicerrectora de Tresferencia y Relaciones cola Empresa, Begoña Cueto, va buscar, al traviés de los trés programes mentaos, favorecer el desenvolvimientu de competencies qu'averen al estudiantáu al mundu de la empresa y que promuevan la xeneración d'idees de negociu. El conveniu recueye una subvención per parte del conceyu de 30.000 euros por que la universidá ponga en marcha los programes. 

 

La vicerrectora de Tresferencia y Relaciones cola Empresa, Begoña Cueto, esplicó que "ye fundamental  que les alministraciones públiques cunten cola Universidá d'Uviéu para poner en marcha esti tipu de proyectos rellacionaos col emprendimiento y l'empresa", y añedió que "la universidá ye una fonte de creación de talentu que tien impactu directu nel ecosistema entamador de les ciudaes". Amás, fixo fincapié en "el beneficiu qu'esti tipu de programes pueden tener nel nuesu estudiantáu".

 

Pela so parte, el  conceyal d'Economía y Tresformamientu Dixital del Conceyu d'Uviéu, Javier Cuesta, señaló que "la universidá ye una de les principales canteres de emprendimiento cola que cuntamos". "Nos titulaos universitarios conflúin formación, talentu ya innovación y eses son les bases sobro les que tienen de crecer los proyectos empresariales nel sieglu XXI. Con esti conveniu queremos aprovechar al máximu esa cantera y fomentar la vocación entamadora, pero amás poder identificar proyectos con potencial de desenvolvimientu que puedan convertise n'empreses de crecedera acelerada, ceadores d'empléu y riqueza", añedió. 

 

Al actu de la firma del conveniu, que tuvo llugar na Sala de la Prensa del Edificiu Históricu de la Universidá d'Uviéu, tamién asistieron Daniel González Alonso, asesor d'Área d'Economía del Conceyu d'Uviéu y Santiago Fernández López, director de la Fundación Universidá d'Uviéu.