El rector de la Universidá d'Uviéu, Ignacio Villaverde, celebró l'anunciu realizáu ayeri por Adrián Barbón, presidente del Principáu, con respectu al campus d'El Cristu. Villaverde manifestó qu'esti anunciu "puede rematar una de les grandes aspiraciones de la universidá, pindia dende l'añu 1989". El rector esplicó que la creación d'un gran campus universitariu n'El Cristu yera una reivindicación histórica de la institución académica. "L'allugamientu de centros de la Universidá d'Uviéu n'El Cristu, nos terrenes del antiguu hospital, yá s'estudiara per parte de la institución a finales de los años 80. Hubo, amás, un proyectu tamién na dómina del Campus d'Excelencia Internacional con Vicente Gotor, un par más mientres el mandatu de Santiago García Granda y nós, a partir d'esos proyectos previos, tamién fixéramos propuestes nesi sentíu al Principáu", puntualizó.

 

Villaverde señaló que "esti proyectu va dexar a la Universidá ordenar les sos infraestructures n'Uviéu, consolidar Uviéu como una gran ciudá universitaria, con dos grandes campus -al norte, El Milán y al sur, El Cristu- y va dexar crear ecosistemes universitarios que siempres son bien granibles, tanto pa la mesma universidá como pa la so redolada". 

 

L'anunciu que realizó ayeri'l presidente del Principáu, según señaló'l rector, "va na llínea de lo que yá se recoyía nos planes estratéxicos de la institución, aprobaos en mayu pol Conseyu Social y tamién nel programa col qu'esti equipu presentar a les elecciones". "Agora hai que ponese a trabayar pa desenvolver tolos planes, diseñar el Campus, que tien que ser un Campus exemplar, sostenible ya innovador, porque ye'l futuru de la universidá pa siquier les próximes décades", añedió. 

 

El rector de la Universidá d'Uviéu esplicó qu'esti anunciu nun afecta a cuestiones de fondu recoyíes nos planes estratéxicos de la institución, que yá señalaben textualmente que "el retu n'Uviéu ye desenvolver una solución urbana que xire en redol a una exa vertical con dos grandes ciudaes universitaries al norte (El Milán) y al sur (El Cristu), dexando l'espaciu centro pa los órganos de gobiernu universitariu". 

 

Villaverde indicó, amás, que "la universidá trabaya yá p'acometer axustes nes soluciones al curtiu plazu pal problema d'espacios en Llamaquique". "Siempres tresllademos al Principáu que pa nós lo importante y lo principal yera resolver esos problemes. Pa ello, desenvolviéramos un plan que nun tenía nel so horizonte más cercanu los terrenes del HUCA. Agora, sí tenemos esos espacios nun horizonte más cercanu polo que vamos acometer los axustes oportunos", concluyó.