Un equipu d'investigadores de la Universidá d'Uviéu empobináu pol Dr. Carlos López-Otín llogró descifrar el xenoma de l'aguamala inmortal, Turritopsis dohrnii, y definió diverses claves xenómiques que contribúin a estender la so llonxevidá hasta'l puntu d'evitar la so muerte. L'estudiu publicóse güei na revista americana Proceedings of the National Academy of Sciences (USA). Esta diminuta aguamala, de tan solu unos pocos milímetros de llargor, tien la estelante capacidá de revertir la dirección del so ciclu vital escontra un estadiu anterior asexual llamáu pólipu. La inmensa mayoría de los seres vivos, tres la etapa reproductiva, avancen nun procesu característicu d'avieyamientu celular y tisular que remata cola muerte del organismu. Sicasí, T. dohrnii tien la facultá d'escoyer otru camín: revertir el so ciclu vital y remocicar. 

 

La secuenciación del xenoma de Turritopsis dohrnii, xuntu col de la so hermana mortal Turritopsis rubra, y l'usu de ferramientes bioinformáticas y de xenómica comparativa dexaron a el investigadores identificar xenes amplificaos o con variantes diferenciales característiques de l'aguamala inmortal. Estos xenes tán acomuñaos cola replicación y l'arreglu del ADN, el caltenimientu de los telómeros, la renovación de la población de célules madre, la comunicación intercelular y l'amenorgamientu del ambiente celular oxidativo. Toos ellos afecten a procesos que n'humanos s'acomuñaron cola llonxevidá y l'avieyamientu saludable. Amás, l'estudiu refechu de los cambeos na espresión xénica mientres el procesu de remocicamientu nesta aguamala inmortal dexó afayar señales de silenciamiento de xenes mediaes pola denominada ruta "Polycomb" y l'aumentu de la espresión de xenes rellacionaos cola vía de pluripotencia celular. Dambos procesos son necesarios por que célules especializaes puedan desdiferenciarse y ser capaces de convertise en cualquier tipu de célula, formando asina'l nuevu organismu. Estes resultancies suxuren qu'estes dos rutes bioquímiques son mediadores fundamentales del remocicamientu cíclicu d'esta aguamala. 

 

Nesti sentíu, Maria Pascual-Torner, investigadora postdoctoral del Departamentu de Bioquímica y Bioloxía Molecular de la Universidá d'Uviéu y primer autora del artículu xuntu con Dido Carrero, señala que "más qu'esistir una clave única de remocicamientu ya inmortalidá, los diversos mecanismos atopaos nel nuesu trabayu actuaríen de forma sinérgica como un tou, orquestando garré'l procesu para asegurar l'ésitu de remocicamientu de l'aguamala inmortal". Finalmente, Carlos López-Otín, catedráticu de Bioquímica y Bioloxía Molecular de la universidá asturiana, indica que "esti trabayu nun escuerre la busca d'estratexes para llograr los suaños d'inmortalidá humana que dalgunos anuncien, sinón entender les claves y les llendes de la fascinante plasticidad celular que dexa que dellos organismos sían capaces de viaxar tras nel tiempu. D'esta conocencia esperamos atopar meyores respuestes frente a les numberoses enfermedaes acomuñaes al avieyamientu que güei nos acorvien".

 

Nesti estudiu, financiáu pola Unión Europea (deAGE Advanced Grant) y el Ministeriu de Ciencia ya Innovación, tamién participaron Dido Carrero, José G. Pérez-Silva, Diana Álvarez-Ponte, David Roiz-Valle, Gabriel Bretonos, David Rodríguez, Daniel Maeso, Elena Mateo-González, Yaiza Español, Guillermo Mariño, José Luís Acuña y Víctor Quesada, del Departamentu de Bioquímica y Bioloxía Molecular, del Institutu Universitariu d'Oncoloxía del Principáu d'Asturies (IUOPA), del Institutu d'Investigación Sanitaria del Principáu d'Asturies (ISPA) y del Observatoriu Marín d'Asturies (OMA).