El campus de Mieres podría acoyer unu de los nodos nacionales de supercomputación y xestión de datos, lo que supondría la integración de la Universidá d'Uviéu na Rede Española de Supercomputación, ensin presencia asturiana na actualidá. L'actuación forma parte d'un proyectu de mayor valumbu, impulsáu pol gobiernu del Principáu y que pretende dessarrollar un polu tecnolóxicu na Cuenca del Nalón. 

 

Para valorar les posibilidaes d'esti proyectu, el rector de la Universidá d'Uviéu visitó güei el Centru d'Innovación de la Universidá d'Uviéu, acompañáu del conseyeru de Ciencia, Innovación y Universidá, Borja Sánchez, y del director d'Operaciones del Centru Nacional de Supercomputación (Barcelona Supercomputing Center), Sergi Girona. Na visita, constataron los equipos colos que cunta la institución académica y mantivieron un alcuentru con investigadores del ámbitu d'informática y computación.

 

La Rede Española de Supercomputación, una Infraestructura Científica y Técnica Singular (ICTS) del Ministeriu de Ciencia ya Innovación, ta distribuyida por tola xeografía española y compuesta por 14 nodos interconectaos ente sí por redes d'alta velocidá.  La so misión ye ufiertar los recursos y servicios de supercomputación y xestión de datos necesarios pal desenvolvimientu de proyectos científicos y tecnolóxicos innovadores y d'alta calidá, por aciu convocatories competitives basaes na excelencia científica de los proyectos a desenvolver. 

 

La integración nesta rede asitiaría Asturies dientro del mapa de les ICTS, del qu'anguaño ta ausente, lo qu'implicaría trabayu en rede y financiamientu. Amás, sirviría pa impulsar el xerme del cluster de computación científica que ta funcionando nel campus de Mieres.

 

Primeramente, realizárase xuna visita a les galeríes del Pozu Santiago, n'Ayer y percorrieron l'esterior de l'antigua esplotación minera acompañaos pol presidente d'Hunosa, Gregorio Rabanal y l'alcalde d'Ayer, Juan Carlos Iglesias. L'oxetivu nesti casu ye estudiar la posibilidá d'asitiar infraestructures informátiques nesti enclave. L'interés de la propuesta respuende a trés fines: da-y un nuevu usu a antigües instalaciones mineres; embrivir l'impactu enerxéticu y la buelga de carbonu que supon caltener grandes infraestructures de computación, pa lo que s'aprovecharía l'agua de la mina; y, finalmente, garantizar la seguridá qu'anguaño riquen los equipos informáticos que remanen grandes datos.